Aunukšen piirin Šuuren Sellin kylän Dubrovinin taluo alettih korjata.
Dubrovinin talo on puuarhitektuurin muistomerkki. Še on pahašša kunnošša ta jo monta vuotta vuottau restaurointie. Tänä talvena talošša on šuoritettu konservointaruavot, kumpaset autetah šäilyttyä talo ta šuojellah šitä onnettomuošta.
– Talošta otettih pois vuaralliset rakentehet, kumpaset voijah kuatuo, šekä korjattih hiršiläjijä taloušošašta. Kaikki rakentehet lajiteltih ta pantih merkkijä šemmosih, kumpaset šuau myöššyttyä taloh restauroinnin aikana. Niise talošša vajehettih katto, ilmottau Kulttuuriperinnön muistomerkkien šuojelun virašto.
Ruatojen jälkeh šuau jatkua talon korjaušta, eččie keinoja, mitein šitä käyttyä tulovaisuošša ta ottua šitä huomijoh valmistuan restaurointiprojektie. Ruatoja šuoritti Kuittisen kyläkunta, kumpasen omaisuošša talo nyt on.
Dubrovinin talo on Šuuren Sellin kylän helmi. Dubrovinin talon pelaššuš alko Rakennuš eruou toisista taloista, šentäh kun še on rikkahašti korissettu. Talon isäntä Mihail Dubrovin oli taitaja puušeppä. Hiän luati huonehkaluja ta iče leikkasi puušta koristehie omua taluo varoin. Monta vuotta talo oli pahašša kunnošša ta šeiso käyttämättä, šen lisäkši talvella 2018 šen taloušoša hajosi.
Teksti: Uljana Tikkanen, Oma Mua 19.1.2022
Foto:: Kulttuuriperinnön muistomerkkien šuojelun virašton vk-šivu