Karjalan kanšallisešša teatterissa mäni Hyperbolaini-spektaklin enši-ilta. Kalevala-eepossan peruštehella valmissettu näytelmä on karjalan kielen vienan murtehella.
Karjalaisien runojen juonet Lemminkäiseštä, hänen muamošta ta pereheštä šekä karjalaiset legendat ta tarinat innoššettih ohjuajua Jegor Černišovie ta käsikirjuttajua-dramaturgie Anastasija Bukrejevua valmistamah spektaklie nykyaikasista ta rahvahalla ominaisista ihmisšuhtehien proplemoista.
‒ Hyperbolaini-spektaklissa piähahmot ei olla enyä väkövät šankarit eikä heilä ole erinomaista taikavoimua, vain hyö ollah tavalliset ihmiset omine tavallisine intoloineh, šanottih spektaklin valmistajat.
Näytelmän piäšankari Lemminkäini, kummaista šamoinki kučutah Ahtiksi ta Hyperbolaisekši lähtöy mutkikkahah pitkäh matkah, kumpani on täyši kuot’t’elukšie, käršimykšie ta virheitä. Matan tarkotukšena ei ole muailman pelaštamini vain oman ičen šekä elämän tarkotukšen eččimini. Matašša jumalat ei enyä auteta lieto Lemminkäistä, ka tovellini miešyštävyš ta pereh ollah tukena vaikeissa hetkilöissä.
Nuori mieš kavotti oman nimen, pelašti kallehen kaverin elämän, šai tiijuštua totta omašta tuatošta, kummaista poika piti Hyperboreja-taikamuan eläjänä, ka löysi šen Tuonelašta ta ymmärti, jotta molommat ollah tavalliset kuolovaiset henket. Lemminkäisen muamo šäilytti šytämeššä poikah alkuperäistä hahmuo ta tovellista nimie ta kokosi lempipojan ilman kaikkie liikua, mi häiriččöy elämyä.
Karjalaisie runoja, kumpaset ollah spektaklin pohjana esittäy moni-iänini kuoro. Laulut ta musiikki lisätäh henkenhapatukšie ta värissytäh kaččojua šamoin kuin tanššit ta valolaittehien käyttö. Šanakši spektakli on minimalismityylissä, mušta ta valkie väri ta valotušlaittehet, kumpasilla kuvual’l’ah kaikkie, äšen aivan vaštakohtasieki as’s’oja.
Koko spektakli on karjalan kielellä. Jegor Černišovin ta Anastasija Bukrejevan kirjuttaman käsikirjutukšen vienakši kiänti Galina Lettijeva.
‒ Kiännökšeh mäni kolme netälie ta mie kiännin 10–12 tuntie päiväššä. Konša enšimmäisen kerran nävin tekstin, ajattelin, a mitein šitä voipi kiäntyä? Teksti on ylen vaikie. Tahon šanuo, kuin moločat artistat ollah, jotta opaššuttih omat roolit, vaikka monet heistä ei tiijetä karjalan kieltä ta enšin heilä oli vaikie lukie, kerto näytelmän kiäntäjä Galina Lettijeva.
On kunnivo, jotta uuši teatterikauši alko spektaklilla vienakši. Näytelmän piäroolissa oli Gleb Germanov, hänen yštävän roolie esitti Karjalan anšijoitunut artista V’ačeslav Pol’akov ta muamuo – Karjalan anšijoitunut artista Ol’ga Portretova. Enši kertua spektakli näytetäh pimiekuun 8. päivänä. Spektakli on valmissettu Pienen kotimuan kulttuuri -projektin rajoissa.
Teksti: Uljana Tikkanen, Oma Mua 11.10.2023
Piäkuva: Mušta ta valkie väri ta valotušlaittehet, kumpasilla kuvual’l’ah kaikkie, äšen aivan vaštakohtasieki as’s’oja.
Kuva: KARJALAN KANŠALLISEN TEATTERIN VK-ŠIVU
