Karelia-kirjalližuspalkindon voittai on Riko Saatsi – Yönistujat-romuanu sanelou voinua pajennuon karjalazen perehen starinan

Riko Saatsin Yönistujat-romuanu oli mulloi sežo Finlandia-palkindon ehoitetunnu. Kuva: Tuomo Parikka, Gummerus

20 000 euron palkindo juattih enzimästy kerdua. Sen andoi Karjalazen kul’tuuran eistämisfondu.

Uvven Karelia-kirjalližuspalkindon enzimäine voittai on Riko Saatsi omassah tevoksenke Yönistujat. Voittai sanottih julgi Jovensuus suovattan.

Yönistujat on lieksalaslähtözen teatruohjuajan Riko Saatsin enzimäine romuanu. Se sanelou Luadogan Karjalan Suistamolpäi voinua pajennuon karjalazen perehen elokseh näh Suomes.

Saatsi toivou, gu palkindon suadu huomavo eistäs edehpäi kielizakonua, kudai andas mahtuo kielen opastundah päivykodilois da školis karjalankielizien suguloin lapsile.

Yle Uudizet karjalakse: https://yle.fi/a/74-20207842