Kantakanšojen päivänä 9. elokuuta Karjalan piäkaupunkissa ta piirilöissä piettih perintehellini etnokulttuuritapahtuma “Karjalaini kruuka”.

Karjalaini perintehellini Kruuka-tanšši yhistäy ihmisie. Kun šitä vejät voipi kaččuo toisien ihmisien šilmih ta tervehtie pruasniekkah tullutta rahvašta. Tänä vuotena Karjalaiseh kruukah ihmisie kučuttih uuteh paikkah – Petroskoin rantakavulla.

‒ Karjalašša hyvissä šuhtehissa ta rauhašša eläy yli 110 kanšua. Tämä aktijo näyttäy, jotta voipi ruatua yheššä ta luatie meijän muata vielä paremmakši ta kaunehemmakši, šano Karjalan kanšallisen ta alovehellisen politiikan ministeri Sergei Kisel’ov.

Eri kanšojen etuštajat tultih rantakavulla vetämäh kruukua. Aktijon vetäjinä oltih Andrei Anisimov ta Lada Karpova.

Kanšojen yštävyön tanššin vetäjänä oli Karjalayhtyvehen johtaja Andrei Anisimov.

‒ Karjalašša kruukoja vejetäh, katrillija ta lantsija aššutah ta piirileikkijä kisatah. Kruuka on ylen vanha tanšši, še on ritualitapahtuma. Joka kyläššä oli oma kruuka: Uhtuon, Rukajärven, Seesjärven ta toisie. A meijän kruuka on kanšojen yhistäjä tanšši. Ota yštävie käteh ta aštukkua miun peräh, šano Andrei Anisimov.

Halukkahie ošallistumah kruukah tänä vuotena oli niin äijän, jotta kaikki ihmiset ei mahuttu yhteh piirih, ka še ei häirinnyn šuaha tanššista hyvyä mieltä. Pruasniekan vetäjät kiitettih kaikkie tullehie ta erikoisešti niitä, ket tultih kanšallisissa pukuloissa. Kruukua tanššittih niise Karjalan monešša piirissä.

Teksti ta kuvat: Uljana Tikkanen, Oma Mua, 16.8.2023
Piäkuva: Tänävuon Petroskois viettih karjalastu kruugua uvves kohtas, Oniegujärven rannal.