Mennyt piättenčän Karjalan Kielen Kois Vieljärvel piettih Kielipezä-seminuaru Anuksen da Priäžän piirin rahvahale – kahtelekymmenele kahtele hengele. Enimät heis ruatah päivykodilois da opastetah lapsile karjalan kieldy.
Ainavo täkse aigua karjalankieline kielipezä ruadau Vieljärven kyläs Karjalan Kielen Kois nellätty vuottu. Sen tavoittehennu on ruadua kui omien lapsien da perehien hyväkse pidäjen tävven ruadopäivän kestäjiä karjalankielisty päivyhoiduo pienile lapsile, mugai sanella omas ruavos mierole, annella tiij ot da nerot. Karjalan Kielen Koin yhtistyksen paginanvedäjän Ol’ga Gokkojevan sanoin mugah, joga vuottu hyö hommatah pari-kolme opastundukerdua kui omih kielipezän ruadajih niškoi, mugai tulolazile. Opastunduseminuarat, kielikursat da ruadopajat kuulutah KKK:n toimindah.
Tämänkerdazes seminuaras käydih päiväčelleh lapsienkazvattajat Anuksenlinnaspäi, Tuuksil, Kotkatjärvel, Miägriel da Priäžäspäi – kaikis nämmis kohtis päivykodilois jo ammui opastetah tippazii karjalua. Naizet suadih nähtä ilmizin, kui ruadau kielipezä da kuulta, kui pidäy sie ruadua, midä tieduo da neruo pidiäy olla. Opastajannu oli KKK:n ruadai, kielipezä-dieluo maltai Natalja Antonova.
– Toizien kannattamine da opastamine meile on anitärgei. Vuottazimmo kielipezien avavundua toizih kohtih, sit meilegi olis parembi mieli ruadua. Yksin on jygei. Dai hyvin ellendämmö, ku luadie kielipezii meijän ololois on ylen jygei. Pidäy olla ellendämisty da abuu kui vallasolijois, mugai perehispäi. Kielipezät oldas ylen syvä kieliruado, ga vikse myö, karjalazet, emmo ole sissäh lujat, ku suaha niidy omih kohtih. Seminuaras olijat rahvas ihan kaikin miellyttih meijän kielipezän ruandah, ga enimät ei uskota, ku niidy suau heij än eländykohtih, sanelou Natalja.
Yhtelläh yksi ainavo kielipezä-juohatus sinä piän rodih. Priäžäläzet rahvas jiävittih viestin, ku allettih ajatella kielipezän suandua Priäžäh. Elämä-etnokul’tuurizen keskuksen ruadajat Tatjana Seppänen da Jelena Ruppijeva da päivykoin ruadai Natalja Petrova ruvetah ajamah sidä dieluo omas kyläs edehpäi. Natalja Petrova hingailehes kielipezän ruadajakse. Häi on valmis käymäh Karjalan Kielen Kodih suamah ližiä opastustu.
Muga hil’l’akkazin Karjalan Kielen Kodi kylviäy kielipezän siemenii da jiäy vuottamah idozii da taimenii. Tässäh Vieljärven kielipezä ruadau ilmai valdivollistu jen’gua, lahjoittajien avul, yhtevyksen da lapsien vahnembien jen’gal. Virguniekoin uskaldetut palkat kahtele libo hozi yhtele ruadajale mugai jiädih kesken.
Teksti. Anni Šallun, Oma Mua 30.9.2020
Foto: Ol’ga Gokkojeva
