23. syvyskuudu Ven’an čomimas Stuanu-kyläs piettih Kegri-pruazniekkua.
“Kegriksi šygyžyllä, Kazanskoista nedelin piäh šuoriečettih”, sanotah tverinkarjalazet, ga joga vuottu syvyskuun lopus Tverin muan eri kohtis pietäh karjalazien perindöllisty pruazniekkua, kuduadu tavan mugah on pietty muatalovuon ruadoloin loppumizekse da karjalazien mifolougizen Kegri-olendon nimekse. Sinä piän piettih festivualii Spiirovan čupun Kozlovo-kyläs da Lihoslavl’an čupun Stuanu-kyläs yhteh aigah.
Tverin alovehen kogo Ven’an čomin Stuanu-kylä, kudai sai tämän stuatusan vuvvennu 2022, vastuau gostii jo monii vuozii. Mieldykiinittäi pruazniekku on čoma da kaikkientiettävy, sih aigah kyläh tulou äijy rahvastu. Tänävuon pruazniekale tuli suuri joukko gost’ua Tolmačču-kyläspäi.
Tolmaččulazet otettih keräle omat pajot da nerot, Podruugat- da Serpantin-pajojoukkoloin inehmizet pajattajes ozutettih kezäruavon tuloksii, kazvoksii da fruktoi, puunvestäi Grigorii Str’ukov toi jarmankale ozutettavakse omua puus luajittuu vestostu.
Nerokkahal ristikanzal joga dielo käzis lähtöy! Tolmaččulazet yhtyttih kilboih, varustajes tikvua kartohkan da grivan kel hyö piästih kilvas enzimäzele sijale.
– Meil oli vessel joukko! Myö pläšiimmö kilvan aigua da pläššimäl autoimmogi toizien joukkoloin rahvahale. Kolme čuassuu meni terväh, saneli tolmaččulaine L’udmila Prohorova.
Tolmačču-kylän haldivo andoi omile kyläläzih autobusan Stuanah ajajes, kaikkiedah matkas oli 11 hengie.
– Tahtozimmo, ku tulienvuon enämbi rahvastu Tolmačuspäs kävys Kegrin pruazniekkah, ližäi paginas L’udmila Prohorova.
Teksti: Natalja Gromova, Oma Mua, 4.10.2023
Kuva: Iraida Belikova, ”Tolmaččulaine L’udmila Prohorova ruislyyhtes käzis”.
