Kieliaktivistu da ristikanzan oigevuksien puolistai Ol’ga Gokkojeva sai kunnivopaginanvedäjän arvonimen.
Moizen piätöksen on luajittu Vieljärvel Karjalan Kielen Kodi -yhtistyksen ligakuul pietyl vuoronmugazel istundol. Ol’ga Gokkojeva on olluh yhtistyksen paginanvedäjänny suurehkon kodvan aigua – vuvvet 2013-2022. Koin halličukseh kuulujien mieldy myö naine maltoi kerätä yhteh sobuh kylän rahvahan, panna allun Koin nostandale, työnyttiä yhtistyksen moneh ruadoh karjalan kielen hyväkse, löydiä artelin Koin abuniekkua da hyvyönluadijua.
Ol’ga Gokkojevan myödäh Karjalan kielen kodih ruadoh tuli karjalankielisty spetsialistua da aktivistua. Täl päiväl Koin seinis joga päiviä kuuluu karjalan kieli. Kuvvel Vieljärves eläjäle ristikanzale Karjalan kielen kodi on andanuh alallizen ruadokohtan – se kylän dielos on aiga merkittävy šeikku. Täs kuvvettu vuottu ruadau ainavo kogo mieros kielipezä da ildupäivykerho školaigäzile lapsile. Yhtistykseh on suadu kuvven kerhon ruandu, erikseh mainittavinnu ollah karjalan kielen kursit, lapsien da ruavahien karjalankielizet teatrat.
Karjalan Kielen Koin listoil on enämbi viittykymmendy yhtymykseh yhtynytty, abuniekkua da kannattajua on kerdoi enämbi. Paista karjalakse tävvel suul on Ol’ga Gokkojevan kova mieli. Puolistua ristikanzoin oigevuksii, täs čotas kielellizii oigevuksii, on inehmizen kogo elaijan dielo. Kunnivopaginanvedäi Ol’ga Gokkojeva jatkau olla Karjalan kielen koin aktiivizennu jäzenenny da suurennu abuniekannu.
Yhtistyksen nygözen paginanvedäjän L’ubov’ Popovan sanoin mugah Ol’ga Gokkojevan panos Karjalan Kielen Koin ruadoh on hinnatoi da miärätöi.
– Ol’ga on auttanuh meidy suamah Kyläkodii kanzoinvälizekse kielikeskuksekse, karjalan kielen maltokeskuksekse. Häi on harvinazii ristikanzoi, ylen hyväntahtoine, retivy sanal, vessel da onnuako liijan ruadai. Annammo hänele kunnivopaginanvedäjän arvonimen yksimielizesti. Se toven on lunnastettu. Toivotammo Ol’gale kestämisty, tervehytty da induo ruadoh, sanelou L’ubov’ Popova.
Teksti: Natalja Antonova, Oma Mua 2.11.2022
Foto: Karjalan kielen kodi
