Ihmisellä pitäy olla äijän käršivällisyttä ta ahkerutta, jotta luatie kukloja teatterie varoin. Ka voipi šanuo varmah, jotta tämä on ylen mukava ta kiinnoštava asie. Täššä ruavošša tunnet iččie disainerina ta plastisena hirurgina šekä huolehtijaisena muamonaki. Vet joka šiun luatima kukla on ainutluatuini tevoš.
Myö karjalaiset -projektin rajoissa Koštamukšen eläjät ommellah kukloja Orvokki-teatterie varoin. Tulovaisuošša niitä käytetäh spektakliloissa Kalevala-eepossan mukah.
Juuri šieltä – “Kalevalan” šyvistä runoista – teatterin ohjuaja Tatjana Grebzde ta “Orvokin” artistat šuahah innoššušta henkilöjä varoin. Kuklojen luatimisen prosessie niise johtau Tatjana F’odorovna.
Jevgenija Pullinen ompelomašša kuklua Orvokki-teatterie varoin.
Uuvven kuklan šyntymini ei ole ruttoni, eikä helppo homma. Luatie erikoisie henkilöjä autetah erilaiset materialit. Esimerkiksi, kašvonpiirtehie on parempi piiruštua värilöillä. Šemmoni mukava homma nyt on koštamukšelaisilla.
Muissutan, jotta Myö karjalaiset -projekti šai Karjalan piämiehen granttifondin kannatušta ta šitä toteutetah tämän vuuvven aikana.
Teksti ta foto: Aleksandra Lesonen, 22.6.2022 Oma Mua
