Periodika-julguamos on nähnyh päivänvalgien Komiksat suomelas-ugrilazes muailmas -kuvakniigu. Kniigas on piirustettuloi histourieloi, suomelas-ugrilazil kielil, karjalan da vepsän kielelgi.
Kogomukses painettih komiksat, kuduat oldih piirustettu Elävy kieli -projektan hantuzis vuozinnu 2015-2019. Jovensuun taidoilii Sanna Hukkanen pidi komiksoin ruadopajoi Ven’an eri čuppulois, kus paistah suomelas-ugrilazil kielil. Kniigas on komiksoi, kuduat piirustettih kieliaktivistat, opastujat da opastajat, lehtimiehet da muut. Kogomukses on komiksoi karjalan, vepsän, udmurtoin, marin, komin kielil da toizil.
– Kniigu rodih ylen čoma, kiitän Periodika-julguamon ruadajii. Kniigas ongi komiksoin kiännökset ven’akse da angliekse. Luadimah kiännöksii kanzallizis kielispäi ehoitettih ruadopajoih yhtynyöt, sanoi Elävy kieli -projektan kiändäi Anna Voronkova.
Petroskois kniigua voibi lugie Karjalan karjalazien, vepsäläzien da suomelazien kieliresursukeskukses. Ilmazet kappalehet suajah komiksoin ruadopajoih yhtynyöt.
Kuvakogomuksen painosmiäry on 1000 kappalehtu. Kniigu piäzi ilmoih Kone-fondan, Matias Castrénan liiton, Karjalan Sivistysseuran, Werner Söderström -literatuurufondan da Suomen posol’stvan Moskovas kannatuksel.
Teksti: https://omamedia.ru/ka/news/muamankieldy_nyg_i_komiksois/
Foto: Uljana Tikkanen
