Perussuomelazien kanzanevustai Timo Vornanen on ebäiltynny varavonazundas, zakonattomas pöllätändäs da ammunduvehkehrikkomukses.
Vornanen oli arestuittu mennyt nedälinlopul piätteničän da suovatan välizel yöl helsingiläzen restoranan rinnal roinnuon ammundan jälgeh. Vornanen on lähtenyh kahten nedälin voimattomuslomale kanzanevustajan ruavospäi.
Päivänlasku-Uvvenmuan paikalline suudo on pannuh nakazuaniekse Aleksanteri Kivimäele tyrmiä kuvvekse vuottu da kolmekse kuudu Psihoterapienkeskuksen Vastaamon tiedomurros.
Jovensuus vägivaldazesti kuolluon 4 (nelli)-vuodizen lapsen muamo pyzyy tyrmäs.
Virguniekat vakustetah kuluttajii razvaniäreständäh käytettylöin lipoliizuvalmistehien da hoidoloin riskoih näh.
Lendoyhtivö Finnair keskevyttäy jogapäivähizet lennot Eestin Tartuh kuun aijakse. Vijannu on lendoloi jälgipäivien aigua perävytännyöt GPS-häiričendät.
Šoppingurippuvus on roimas ylehizekse sežo Suomesgi. Dieluo tutkinuon Jyväskylän yliopiston tutkiidohtoran Jussi Nyrhizen mugah telefonan alalline kačahtelendu on yhtevyös šoppingurippuvuoh.
Tuliet nedälit ozutetah, roihgo äijy pin’oidu kezäl. Suomen tävves 40 (nelläskymmenes) čakkulajis vuitti muniu vezilammikkoloih, sendäh dieloh vaikuttau keviän vien miäry.
Kuundele liziä Yle Areenassa: https://areena.yle.fi/podcastit/1-70589084
