Parluamentu on hyväksynnyh halličuksen kiisteltyn bolniččuverkouvvistuksen ylen pienel iänierol.
Halličuksen ezitys hyväksyttih iänin 101–96 (sada yksi – yheksäkymmen kuuzi). Halličuspuolovehis kaikkiedah viizi kokoomuksen da perussuomelazien kanzanevustajua iänesti ezitysty vastah, mi on poikkevukselline dielo.
Helsingis Meilahten sildubolničas on luajittu Suomen enzimäine käinsiirdo. Uvvenmuan eričysvoimattomanhoijos vastuajan HUS-yhtymän mugah leikkavus kesti nenga 17 (seiččietostu) čuassuu.
Lucia-neičoile työtyt rasistizet viestit ollah suadu lahjoitusviehkurin Lucia-kerävyksele. Daniela Owusu rodih rasistizien viestilöin objektakse sit, konzu händy vallittih Suomen Luciakse.
Kela andau luvan väliaigahizeh tallendehien tulkuandah niistielöin da viiputuskielen tulkavuspalvelulois.
Piäl puolet suomelazis pietäh Ylehisradivuo enzimäzel sijal uudismedielois. Tämä tiijustettih markinututkimusyrityksel Norstatal tilatus tutkimuksespäi.
Suomen miehien salibandymuajoukkoveh voitti muailmanmuasterižuon kuadamal Ruočin finualas.
Kuundele liziä Yle Areenassa: https://areena.yle.fi/podcastit/1-72846294
