Yrityksii evustai Eloikeinoeloksen keskusliitto EK vuadiu miljardoin veroalendustu yrityksile
Kaikkiedah 3,5 miljardan euron veroalenduksen tarkoituksennu olis ravevuttua Suomen hillennyh talovus kazvandah. Keskusliitto ehoittau, gu yritysvero libo yhtehistövero čotaittas 20 prosentas 15 prosentah.
Kundien talovus mulloi heikkeni, ga yhtelläh vähembäl, migu allunperin varattih. Monet kunnat suadih omat menot por’atkah siästämäl.
Parluamentas kolmanpiän piettih valdivopäivien avuajazii. Perussuomelazien Jussi Halla-aho jatkau parluamentan paginanjohtajannu.
Nelli suomelastu energiiyhtivyö on perustannuh uvven päiväzenvoimuyhtivön, Suomen Aurinkovoiman. Sen omistetah tazavuittiloin Savon Voima, Oulun Energia, Oulun Seudun Sähkö da Vantaan Energia.
Suomi-kuva on pyzynyh enimite pozitiivizennu muailman tilandeheh kaččomattah. Tämä tiijustettih verekses Finland Promotion Boardan kačahtukses.
Suomen kunnis ennemullostu srojittih da kohendettih rekordumiäry liikundupaikkua. Kunnat sijoitettih liikundah vuvvennu 2023 nenga 390 miljonua euruo.
Suomes mečästettih loppevunnuol mečästyskavvel läs 38 000 hirvie, sanou Suomen riistukeskus.
Kuundele liziä Yle Areenassa: https://areena.yle.fi/podcastit/1-73056101
