Kun tulou Äijäpäivä, ni šiitä kevätki alkau. Valkiet pajunlampahaiset muhitah kevyäseššä päiväpaissošša. Ihan kut’kuttau, niin himottau šilittyä näitä liemenötöppähäisie.
Pälvilöissä rušottau männä šykyšyn puolukkaini, muanittelou šeki: Läkkä pälvimarjah! Lumet šuletah, on hyvä meččyä aštuo. Kevättuuli tuulou hienoseh, hoš ni ahavoinou toičči.
Punaset lennetäh parviloissa. Šuvilintuloista ne myöššytäh enšimmäisinä. Šanotah, jotta punaset tullah jouččenen šiiven alla. Punasilla on valkie vačča ta šeläššä piällä on harmuata ta valkienrušappua höyhentä. Tämä pikkaraini čirkkulintuni pešiy tunturiloilla. Muuttoaikah punasie näköy peltoloilla ta muilla aukeilla paikoilla. Konša missänih lykyštäy, šanotah “piäsi kuin punani pälveh”.
Kevättäy, šiih huomaččautuu, kun värit puhetah pakauttelomah. Pientarilla noššetah piätäh päiväsenkeltaset lešenlehet. Poikkoi limonaliipukkaini lentyä lipittäy vihahtajašša keltakruutašša. Rannat ollah vielä harmuat, ka niitä elävytetäh rantakakkaraisien kiilakankeltaset kukat ta mušovanvihriet lehet. Nurmetki ollah valmehet vihahtamah. Kačoš, jo še ruškiemušta jumalanlehmäki kiilottau tuošša.
Kaiken tämän näköy, kun vain huomuau čukeltua kevyäh.
Šanavakkani: čukeltakka kevyäh – sukeltakaamme kevääseen, Äijäpäivä – pääsiäinen,
– pajunkissat, liemenö – karitsan ensimmäinen villa, töppähäini – tupsu, tuppo, töyhtö, rušottau – punertaa, hoš ni – vaikkakin, toičči – joskus, punani – pulmunen, myöššytäh – palaavat, valkienrušappua – punertavaa, konša missänih lykyštäy – kun jossakin onnistaa, kevättäy – tehdä kevättä, huomaččautuu – havahtuu, puhetah pakauttelomah – puhkeavat puhuttelemaan, päiväsenkeltaset lešenlehet – auringonkeltaiset leskenlehdet, poikkoi limonaliipukkaini – vikkelä sitruunaperhonen, vihahtajašša keltakruutašša – vihertävässä kelta-asussa, elävytetäh – virkistävät, rantakakkaraisien kiilakankeltaset kukat – rentukoiden kirkkaankeltaiset kukat, mušovanvihriet – tummanvihriet, vihahtamah – vihertämään, ruškiemusta jumalanlehmä – punamusta leppäkerttu, kiilottau – kiiltää.
Teksti ta kuva: Olga Karlova
