Kuušamon šuurpetokeškukšeh Kuhmošta tuotu kontien orpopentu onki tyttökontie, ei poikakontie Pena, miksi kontieta jo on keritty kuččuo.
– Kyllä tämä tyttöh vipuau ta hiän on nyt nimeltäh Aina, kertou Kuušamon šuurpetokeškukšen isäntä Sulo Karjalainen.
Männä netälillä kontienpoikasella jo annettih Kuhmošša nimivarianttiloiksi Pentti tahi Aino. Sulo Karjalainen on kehitellyn Aino-nimeštä lopullisekši versijakši Aina.
– Še on pevolla parempi nimi kuin Aino, muhahtau Karjalainen.
Sulo Karjalaisen mukah Aina-kontie on voivaš pentu. Še juuvva lippou maijonvaštikehta šuurella himolla.
– Painuo Ainalla on tullun puolisen kiluo lisyä netälin aikana. Hiän painau nyt 3,5 kiluo, Karjalainen tolkuttau.
Aina hyvyä vauhtie totukšenteliutuu omih isäntih Sulo Karjalaiseh ta konteita šuurpetokeškukšešša hoitajah Pasi Jänttih.
– Še piäštäy ni itun, konša lähemmä häkiltä pois. Šen verran hiän meitä jo ikävöiččöy, šanelou Sulo Karjalainen.
Pasi Jäntti muissuttau, jotta hoš poikani onki hyväččäini, ka še on ehtin näyttyä ni pevon luontuoh.
– Kyllä še pevon tavoin purasou äkkie šormikkahašta, kun šitä tahot šilitellä. Šormija pitäy kaččuo, Jäntti mainiččou.
Kuušamon šuurpetokeškuš avatah rahvahalla kešällä koronarajottehie pityän.
– Aina-pentuo ihmiset piäššäh kaččomah myöhempäh kešällä, ei ihan kešän alušša, arvelou Sulo Karjalainen.
Kiäntän vienankarjalakši: Olga Karlova
Lähteh: https://yle.fi/uutiset/3-11925475
Foto: Tuula Huovinen. Kontienpoikaset puušša kikisteliytymäššä, Vuokkiniemen Čena.
