Artikkelit

Olgan čuppuni: Runebergintortut karjalakši

Kirjoittanut: Olga Karlova
Julkaistu: 5.2.2024

 

Nyt on še aika vuuvvešta, konša kaffin kera taritah makieččaista sriäpnyä, kumpani on šuanun nimeh Šuomen kanšallisen runoniekan mukah – runebergintorttuloista on pakina.

On mukava, jotta erähät šyömisetki ta paissokšet eletäh imehnisen kera vuuvvenkierron mukaista aikua. Mussikkapiiruat, nakrishauta, roštuonpriänikät, pyhänlašunpullat, mämmi, keitinkolačut.. Jokahisella on še aika, konša ne “mahutah” miän kalenteriloih (tai pöččölöih) šekä parahittuan maissutah.

Viisi vuotta takaperin šain omalta muamakalta, mieheni muamolta, runebergintorttujen reseptin ta šen piällä vieläi paissinmuuvvot näitä sriäpnöjä varoin. Niillä on ollun kačo käyttyö, kun Äijänpäivän kuličatki niissä on hyvä paistua. Pienehköt ne tavallisiksi kuličoiksi ollah, ka meijän perehellä hyvin pätöy.

Vain myöššymmä nyt Pirkko-ämmön runebergintorttuloih. Olen kiäntän häneltä perintönä šuavun reseptin karjalakši ta tahon šen jakua teilä, kallehet lukijat ta kuuntelijat. Muitenki himottais jakua šuomelaiseh šyömiskulttuurih liittyjyä tietuo karjalakši, šentäh kun monešša kohti elän iče Šuomen elošta karjalan kielellä.

Runebergintortut

Tarvičet:

– 200 g margariinie tahi voita
– 1½ dl šokeripeskuo
– 2 kananjiäliččyä
– 2 dl škorppujauhuo
– 1 dl vehnäjauhuo
– 1 dl mantelijauhuo
– 1 dl maituo tahi sliuhkua
– 1 čl leivinjauhetta

Koššutukšeh:

– omenamehuo

Piällä:

– vavarnovaren’n’ua
– 1 dl tuhkašokerie + ½ sl vettä

Luaji taikina näin:

Hiero pehmie margariini tahi voi ta šokeripesku vuahekši.

Lisyä jiäličät yksittyän piekšyän.

Ševota kuivat ainehet keškenäh ta lisyä joukkoh yheššä maijon tahi sliuhkojen kera.

Voitele paissinmuuvvot ta täytä ne taikinalla vajaiksi.

Paissa 200 aštehešša 15-20 min.

Anna kotvasen jähtyö ta nošša tortut luuvvalla.

Tahtonet, voit koššuttua sriäpökšet omenamehulla.

Lisyä torttujen kešellä vavarnovaren’n’ua ta luaji tuhkašokerin ta vejen ševokšešta valkie vanneh varen’n’ašilmäštä ympäri.

Makieta Runebergin päivyä teilä!

Šanavakkani: taritah – tarjotaan; sriäpnyä – leivonnaista; nakrishauta – naurilaatikko; roštuonpriänikät – piparit; pyhänlašunpullat – laskiaispullat; keitinkolačut – rinkilämunkit; pöččölöih – mahoihin; muamakalta – anopilta (miehen äiti); vieläi – vieläkin, lisäksi; paissinmuuvvot – vuoat; Äijänpäivän kuličat – pääsiäsen aikaan syötävät leivonnaiset eli kulitsat; vain myöššymmä – mutta palataan; ämmön – mummin; kallehet lukijat – arvoisat lukijat; šokeripeskuo – hienoa sokeria; jiäliččyä – munaa; sliuhkua = kermua; varvanovaren’n’ua = malinavaren’n’ua – vadelmahilloa; tuhkašokerie – tomusokeria; luaji – tee; piekšyän – vatkaten; luuvvalla – lautasella; tahtonet – jos haluat; sriäpökšet – leivokset; vanneh – kuviona: ympyrä, raita, juova.

Linkki karjalankielisih reseptilöih

Linkki sriäpnäšanaštoh (leivonnaisten nimitykset, suomi-vienankarjala)

Kuva: Runebergintorttuo ta čäijyö hauvotunmaijon kera.

Lue nämäkin:

Älä näpistele, yhtistä!

Älä näpistele, yhtistä!

Piäkuva: Karjalazien perindölline syömine – šipainiekat – on tulluh Karjalan brendakse. Kuva: Jelena Migunova On ylen hyvä mieles, ku karjalazien perindölline syömine – šipainiekat – on tulluh Karjalan brendakse, ku sidä suvaijah kaikkiel da tullah meile opastumah...

Karjalan kieli elämäššä ta harraššukšissa

Karjalan kieli elämäššä ta harraššukšissa

Piäkuva: Jokahini heistä nyt voipi ymmärtyä, lukie, kirjuttua ta paissa karjalakši. Kuva: Uljana Tikkanen Karjalan kielen vienan murtehen kurššilla oli pietty viimeni oppitunti. Kurššilaisilla oli tehtävä – valmistua esityš ta kertuo, mimmoni rooli karjalan kielellä...

Mikä on Uutisčuppu?

Uutisčuppu – Uudisčuppu on Karjalan Sivistysseuran uusi ajankohtaiskanava. Julkaisemme tällä sivustolla kiinnostavia uutisia ja tietoa tulevista tapahtumista.

Tilaa uutisviesti

Tilaa sähköpostiisi ilmoitukset uusista artikkeleista.