Laji on Šuomešša luajalti levinnyn, ka luvultah harvinaini. Koko muajilmašša ikkunakärpäsie on šiinä 420 lajie. Uuši laji eläy meččälintujen pešäkololoissa. Šentäh šen šuomenkielini nimi voiski olla metsäikkunakärpänen (karjalakši kiännettynä meččäikkunakärpäni).
Šuomešta on löyvetty tietehellä uuši kärväislaji.
Uuši laji on 4–5 millimetrin šuuruvuini, hoikkani ta mušova laji, kumpani kuuluu ikkunakärpäsien heimoh. Šuvun parahiten tunnettu evuštaja on liäväikkunakärpäni, min lisäkši Šuomešša on tiijetty pitemmälti muštaikkunakärpäni.
Koko muajilmašša ikkunakärpäsie on noin 420 lajie, kumpasista šuurin oša eläy muapallon äkeillä ta kuivilla alovehilla. Niin ni Šuomešša tiijetyt lajit on ašettauvuttu elämäh kuivilla elinšijoilla, kuin elukkojen pešissä, missä niijen toukat ečitäh šualehekšeh toisie pöpökkäisie.
Uuši laji eläy meččäalovehien lintujen pešäkololoissa ta -liukkuloissa. Šentäh šen nimi voiski olla meččäikkunakärpäni.
Laji on Šuomešša luajalti levinnyn, ka luvultah harvinaini. Meččäikkunakärpäni on tiijuššettu vain Šuomešša, ka še varmah löytynöy lähialovehiltaki.
Olenta tiijuššettu jo aikoja, vašta nyt tutkimuštyö šuatu valmehekši
Meččäikkunakärpäsen olenta on ollun tiijošša jo parikymmentä vuotta. Ensin laji oli viärin miäritetty, kuni kakšišiipistutkija ta Helsinkin Luonnontietehellisen keškušmusejon digitointikoordinattori Jere Kahanpää ei ruvennun epyälömäh karväistä tietehellä tuntomattomakši.
Šelvitäntäruanta pietty vuosiksi, ka nyt työ on lopulta šuatu valmehekši tutkimušohjelman mukasešti, kumpaista on tuken ympäristöministerijö. Laji kačottih tätä iellä tuntomattomakši ta še šai tietoyhtövehen hyväkšytyn lajistatussan nimineh.
Lajin kekšimiseššä tärkieššä roolissa olijan Jere Kahanpään čestiksi, lajin tietehellä uutena kuvannuot tutkijat Jaakko Pohjoismäki ta Antti Haarto annettih šillä nimekši Scenopinus jerei.
Virallini tietehellini šeloššuš, mitä luajittih Päivännoušu-Šuomen yliopiston ta Turun eläinmusejon tutkijat, on julkaistu Zookeys-leheššä.
Kiäntän vienankarjalakši: Olga Karlova
Lähteh: https://yle.fi/uutiset/3-12100749
Šulkuloissa on kiäntäjän kommentti
