On valmis uuši Oma kieli -mobiilišovelluš, kumpasešša voipi opaštuo karjalan ta vepšän kielen šanoja.
Nyt šovellukšešša on kolme šanaštuo: vienan ta livvin murtehien šekä vepšän kielen 320 šanua. Livvin šanaštuo valmisti Natalja Sinitskaja, vienan – Maikki Spitsina ta vepšän kielen – Galina Baburova.
– Näitä šanoja rikenempäh käytetäh pakinašša. Myö ottima ne šanat, kumpasie käytetäh OMA MEDIA -portalin onlinekurššiloilla, jotta opaštujat vo tais helpommin šuorittua šenki tehtävie, šano Periodika-kuštantamon johtaja ta livvin šanašton valmistaja Natalja Sinitskaja.
– Šovelluš on šemmosie ihmisie varoin, ket maltetah lukie, ka vašta alotetah opaštuo karjalan kieltä šekä tahotah oppie uušie šanoja mukavašti. Šovellukšen tarkotukšena on kiinnoššuttua ihmisie kielen oppimiseh šyvemmin, kerto Oma Mua -lehen piätoimittaja ta vienan šanašton valmistaja Maikki Spitsina.
Šovellukšešša voipi opaštuo šanojen kiännökšet venäjäštä valittuh kieleh ta päinvaštoin, lukie kieliopillisie šiäntöjä, pelata älypelilöih.
– Šovelluš on šelvä käyttäjällä ta šitä pitälti vuotettih. Joka vapua hetki ihmini voipi toistua šanoja ta oppie uušie, lisäsi Natalja Sinitskaja.
Šovellukšen luatijien šuunnitelmissa on kehittyä šitä näin, jotta joka käyttäjä vois lisätä opittavakši omie šanoja. Kaikkie tietoja šovellukšešta voipi löytyä šillä omissetulta omakieliapp-VK-šivulta. vk.com/omakieliapp
Teksti: Uljana Tikkanen, Oma Mua, 15.11.2023
Kuva: Nyt šovellukšen joka šanaštošša on 320 šanua. Uljana Tikkanen
