“Oman Muan” toimittajat hyvitelläh lehen lukijie ta kirjuttajie Uuvvella vuuvvella ta Roštuolla! Tervehyttä teilä ta hyvyä mieltä vuotena 2024! Olemma kiitolliset teilä, jotta pisyttä meijän lukijien joukošša, šäilytättä ta kehitättä karjalan kieltä.
Myö, toimittajat, kiitämmä jokahista, ken kannattau lehtie tiluamisella ta lukomisella. Ta šata passipuo šillä, ken ei ainuoštah luve, ka vielä kirjuttauki lehteh!
Tänä vuotena “Oman Muan” toimitukšešša tapahtu muutokšie. Lehteh tuli uušie ruatajie, hyö ollah viteleläini L’ubov’ Baltazar ta petroskoilaini Nadežda Mičurova, kumpasien nimet varmašti ollah jo hyvin tutut lehen lukijalla.
Tietyšti lehen luajinta ei ole vain šen toimittajien ruato. Meilä ei olis šemmoista lehtie ilman meijän apulaisie, kirjuttajie, n’euvojie ta toičči moittijieki. Passipo niillä, ket yllytetäh omie muanmiehie tiluamah lehtie ta lukomah karjalakši. Hyö ollah Anni Vlasova (Piäjärvi), Vladimir Ivanov (Segeža), Oksana Serebr’annikova (Veškelyš), Nina Barmina (Vieljärvi, Nuožjärvi), Galina Vasiljeva (Jessoila), Valentina Libertsova (Alavoini), Tatjana Romanova (Aunuš), Alevtina Lesonen (Kalevala) ta L’udmila Tihonova (Koštamuš).
Tänäpiänä myö emmä voi kehuo, jotta lehen tiluajien miärä kašvau, ka voimma löyhkyä, jotta še ei pienene. Nyt on monta kynnyštä lehen kehittämisekši, ta piälimmäiset niistä kaikin tiijetäh: kieltä ei opaššeta kaikissa opaššušlaitokšissa šekä karjalakši pakasijien miärä vähenöy. Niin, tänä vuotena myö šanoma viimeset jiähyväiset karjalaisella runoilijalla Sergei Jakovlevilla, lehen kirjuttajilla L’udmila Bobinalla ta Boris Detčujevilla, ainasella lukijalla Aili Rettijevalla.
Tänä vuotena “Oma Mua” vietti kakši kilpailuo. Enšimmäini niistä, Oma rantani -kilpailu kešti koko vuuvven ta hyvin miellytti lehen lukijie – šaima kilpailuh monta kirjutušta Karjalan eri paikoista. Kilpailun tulokšet on ilmotettu täššä numerošša. Toisen, Šua “Oma Mua” lahjakši -kilpailun pitimä šykyšyllä ta šen tulokšien mukah lahjottima lehen tulaukšie vuuvven 2024 enšimmäisellä puoliskolla “Oman Muan” šeiččemellä kirjuttajalla.
Ušomma, jotta kilpailijat ruvetah iellähki kirjuttamah lehteh ta niin meijän kirjuttajien joukko rupieu kašvamah. Enši vuuvven pakkaiskuušša ilmotamma uuvven kilpailun ta rupiemma vuottamah šiih teijän kirjutukšie.
Toivotamma meijän lukijilla, apulaisilla ta kaikilla karjalaisilla parašta ošua ta lujua tervehyttä, rauhua ta omahisien lämpyö! Šuojelkua omua kallehimpua uarrehta – kieltä ta kulttuurie! Ta muistakkua tilata oma karjalaini lehti!
Teksti: Maikki Spitsina
Kuvat: Alina Kartinen
