Pääkuva: Aarón Blanco Tejedor, Unsplash

Livvinkarjalakse:

Säveldä da sanoita uuzi karjalaine lapsienpajo!

Karjalan Sivistysseuran lapsienpajokilbu

Kilvan tavoittehennu on luadie uuttu karjalankielisty lapsienmuuzikkua, kudai virittäy lapsii keräle pajattamah, elostamah da kižuamah sego opastumah karjalan kieleh. Kilbah työtty pajo pidäy olla karjalankieline, päitä kaikenigähizile lapsile da sih niškoi pidäy luadie päivykois olijoile lapsile pättävy pajokiža. Muuzikkustiil’ua libo pajos käytettyy karjalan kielen murrehtu ei ole rajattu.

Kilbah otetah ozua työndämäl kappalehen demoiäniteh, sanoitus erillizenny tekstannu da pajokižan ohjavot (kirjalline libo video) Karjalan Sivistysseuran toimistoh sähköpoštači () 31.8.2026 sah. Demoiänittehen yhtevyöh ližätäh kappalehen nimi, ozuttajan libo ruadojoukon nimi sego yhtevystiijot (sähköpoštuadressi da telefonannoumeru).

Kilvan palkindo on 1000 € voittajan kappalehen ruadojoukole. Ližäkse Karjalan Sivistysseura luadiu voittajas pajos iänittehen da kižaohjavot.

Voittajan kappalehen iäniteh da kižaohjavot juatah kylmykuul päivykodiloih da školih Suomen eri čuril (da mahtoloin mugah Karjalan tazavaldah), gu karjalan kielen nedälii voidas pruaznuija pajattajen da kižaten sego karjalan kieleh tuttavujen.

Kilvan žyrijoukkoh kuulutah: Emmi Kuittinen, Viliina Silvonen da Niko Tynnyrinen.

Suvikarjalaksi:

Sävellä da sanota uuzi karjalane lapsienlaulu!

Karjalan Sivissysseuran lapsienlaulukilba

Kilvan tavottehena on luadie uutta karjalankielistä lapsienmuuzikkua, kumbane virittäy lapsie laulamah da kizuamah segö opastumah karjalan kieleh. Kilbah työnnettävän laulun pidäy olla karjalankieline, päitä kaikenigäzillä lapsilla da sidä varoin pidäy luadie päiväkoissa olijoilla lapsilla pädijä laulukiza. Muuzikkastiil’ua libo laulussa käytettäviä karjalan kielen murrehta ei ole rajattu.

Kilbah otetah ozua työndämällä laulukappalehen demoiäniteh, sanotus erillizenä tekstana da laulukizan ohjavot (kirjalline libo video) Karjalan Sivissysseuran toimistoh sähköpoštačči () 31.8.2026 suaten. Demoiänittehen yhtevyöh lizätäh kappalehen nimi, ezittäjän libo ruadojoukon nimi dai yhtevystiijot (sähköpošta-adressa da telefonannomera).

Kilvan palkindo on 1000 € voittajan kappalehen ruadojoukolla. Lizäksi Karjalan Sivissysseura luadiu voittajasta laulusta iänittehen da kizaohjavot.

Voittajan kappalehen iäniteh da kizaohjavot juatah pimiekuussa päiväkodiloih da školih Suomen eri čurilla (da mahtoloin mugah Karjalan tazavaldah), jotta karjalan kielen nedälie vois pruaznuija lauluan da kizaten segö karjalan kieleh tuttavustuon.

Kilvan žyrijoukkoh kuulutah: Emmi Kuittinen, Viliina Silvonen da Niko Tynnyrinen.

Vienankarjalakši:

Šävellä ta šanota uuši karjalaini lapšienlaulu!

Karjalan Šivissyššeuran lapšienlaulukilpa

Kilvan tavottehena on luatie uutta karjalankielistä lapšienmusiikkie, kumpani virittäy lapšie laulamah ta kisuamah šekä opaštumah karjalakši. Kilpah työnnettävän laulun pitäy olla karjalankielini, paššata kaikenikäsillä lapšilla ta šitä varoin pitäy luatie päiväkoissa olijilla lapšilla pätijä laulukisa. Musiikkistiil’ua tahi laulušša käytettävyä karjalan kielen murrehta ei ole rajattu.

Kilpah otetah ošua työntämällä laulukappalehen demoiäniteh, šanotuš erillisenä tekstinä ta laulukisan ohjiet (kirjallini lipo video) Karjalan Šivissyššeuran toimistoh šähköpoštičči () 31.8.2026 šuaten. Demoiänittehen yhtevyöh lisätäh kappalehen nimi, esittäjän tahi ruatojoukon nimi šekä yhtevyštiijot (šäköpoštiadressi ta telefoninnumero).

Kilvan palkinto on 1000 € voittajan kappalehen ruatojoukolla. Lisäkši Karjalan Šivissyššeura luatiu voittajašta laulušta iänittehen ta kisaohjiet.

Voittajan kappalehen iäniteh ta kisaohjiet juatah pimiekuušša päiväkotiloih ta koululoih Šuomen eri čupukkoih (ta mahtojen mukah Karjalan tašavaltah), jotta karjalan kielen netälie vois pruasnuija lauluan ta kisaten šekä karjalan kieleh tuttavuštuon.

Kilvan žyrijoukkoh kuulutah: Emmi Kuittinen, Viliina Silvonen ta Niko Tynnyrinen.

Suomeksi:

Sävellä ja sanoita uusi karjalainen lastenlaulu!

Karjalan Sivistysseuran lastenlaulukilpailu

Kilpailun tavoitteena on luoda uutta karjalankielistä lastenmusiikkia, joka innostaa lapset mukaan laulamaan ja leikkimään sekä oppimaan karjalan kieltä. Kilpailuun lähetettävän kappaleen tulee olla karjalankielinen, soveltua kaikenikäisille lapsille ja siihen täytyy valmistella päiväkoti-ikäisille lapsille soveltuva laululeikki. Musiikkityyliä tai kappaleessa käytettyä karjalan kielen murretta ei ole rajattu.

Kilpailuun osallistutaan lähettämällä kappaleen demoäänite, sanoitus erillisenä tekstinä ja laululeikin ohje (kirjallinen tai video) Karjalan Sivistysseuran toimistoon sähköpostitse () 31.8.2026 mennessä. Demoäänitteen yhteyteen lisätään kappaleen nimi, esittäjän tai työryhmän nimi sekä yhteystiedot (sähköpostiosoite ja puhelinnumero).

Kilpailun palkinto on 1000 € voittajakappaleen työryhmälle. Lisäksi Karjalan Sivistysseura tuottaa voittajakappaleesta äänitteen ja leikkiohjeen.

Voittajakappaleen äänite ja leikkiohje jaetaan marraskuussa päiväkoteihin ja kouluihin ympäri Suomea (ja Karjalan tasavaltaan mahdollisuuksien mukaan), jotta karjalan kielen viikkoa voidaan juhlia laulaen ja leikkien sekä karjalan kieleen tutustuen.

Kilpailun lautakuntaan kuuluvat: Emmi Kuittinen, Viliina Silvonen ja Niko Tynnyrinen.