Piäkuva: Koko juhlanetäli koululaiset otettih ošua mukavih tilailukših. Kuva: Šuomelais-ugrilaisen koulun VK-šivu
Petroskoin šuomelais-ugrilaini koulu on etumaini opaššušlaitoš, missä lapšet opaššutah karjalua, šuomie ta vepšyä. Šajekuun 25. päivänä koulu piti oman 30-vuotisjuhlan.
”Koulušša vietetäh ušeita tilaisukšie, kumpaset kehitetäh ta parennetah karjalan, šuomen ta vepšän kielen opaštamisen sistemie.”
– Natalja Barkalova
Luaja juhlaohjelma
Juhlalliset tilaisuot alettih jo šyyškuun toisena päivänä, konša koulušša vietettih juhlarivistö.
– Šajekuun 21.–24. päivinä Elias Lönnrotilla nimitetty šuomelais-ugrilaini koulu valmistautu omah 30-vuotisjuhlah. Oli äijän mukavie tilaisukšie: avonaisien ovien päivä vanhemmilla, piiruššukšien ta valokuvien näyttelyjä, laulu- ta runofestivali, kerrotah koulun VK-šivulla.
Šajekuun 25. päiväkši koulun opaštajat valmissettih lapšilla 30 huvitilua: tanššitilaisukšie ta kakkarojen paistamisen muasteri-oppija, elokuvašalija ta pneumattini ampumašali, tietokilpailuja, interaktiivisie pelijä, tietokonehpelijä, teatteri ta muita huvija.
Juhlaohjelma piätty iltapäivällä šuureh Hyvyä šyntymäpäivyä, koulu! -tilaisuoh, missä laulettih, tanššittih ta onniteltih opaštajie ta koululaisie merkittävällä juhlalla.
– Lapšet ta rakkahat kollegat, tänä kaunehena aurinkoisena päivänä viettimä koulun pruasniekkua. Toivotan teilä mäneššyštä, tervehyttä ta äijän voimie, šano koululaisilla, opaštajilla ta vierahilla šuomen kielen opaštaja Jelena Bukačova.
Onnitteluja šanottih šuomekši, karjalakši ta vepšäkši. Näitä kielie opaššetah lapšilla Karjalan alkuperäiskanšojen muamonkielinä enšimmäiseltä luokalta alkuan.
Koulun johtaja
– Olen ollun koulun johtajana 25 vuotta. Šanon tätä kouluo onnen koulukši. Tämä päivä näytti, jotta lapšet käyväh opaššušlaitokšešša mielelläh, korošti koulun johtaja Natalja Barkalova.
Natalja Valerjevnan joholla tavallisešta koulušta tuli etumaini opaššušlaitoš, missä opaššetah karjalua, šuomie ta vepšyä šekä vietetäh etnokulttuuritilaisukšie.
– Kielie opaššetah enšimmäiseltä luokalta alkuan koulun lopettamiseh šuaten. Koululaiset opaššutah muamonkielie opaššuštoiminnan rajoissa. Koulušša vietetäh ušeita tilaisukšie, kumpaset kehitetäh ta parennetah karjalan, šuomen ta vepšän kielen opaštamisen sistemie. Opaštajat aina ošallissutah seminariloih, festivaliloih, pyöreih stolih ta kilpailuih federalisella ta alovehellisella tašolla, valmissettah lapšie kilpailuih, vajehetah kokemušta Petroskoin ta Karjalan tašavallan toisien koulujen opaštajien kera, kerto koulun johtaja.
Natalja Barkalova johtau kouluo jo 25 vuotta. Kuva: Šuomelais-ugrilaisen koulun VK-šivu
Natalja Barkalova on korkietašoni ammattimieš ta taitaja johtaja. Hänen alotuškyvyn anšijošta šuomelais-ugrilaini koulu šai Venäjän paraš koulu -arvonimen ta on toisella paikalla Venäjän etnokulttuurikoulujen kešen.
– Viime kolmen vuuvven aikana koulu alko yhteistyötä Karhumäjen piirin Tolvuja-pos’olkan koulun kera Oneganiemen istorijan, kirjallisuon, kulttuurin ta tapojen opaštamisen alalla. Šamoin ruamma yheššä Piiterin koulujen kera ta toteutamma alovehienvälistä projektie “Koulu šinisen Onegan luona”. Vietämmä yhtehisie tilaisukšie, vajehamma opaštujie ta opaštajie, järješšämmä ekskursijoja, šaneli Natalja Barkalova.
Šuomelais-ugrilaini koulu avattih 1. šyyškuuta 1994 Petroskoin 17. gimnasijan rakennukšešša. Šilloin še oli kaupunkin 52. koulu. Kaikkieh oli 14 opaštajua ta 114 koululaista. Enšimmäisenä johtajana oli Svetlana Ivanovna Heikkonen.
Šyyskuušša 1999 tämä koulu ta kaupunkin 18. koulu yhissettih. Vuotena 2000 šuomelais-ugrilaisella koululla annettih Elias Lönnrotin nimi.
Teksti: Irina Zaitseva, Oma Mua 6.11.2024
Šuomelais-ugrilaini koulu
Šyyškuun tilaštotiijon mukah šuomie opaštuu 892 koululaista. Vepšän kielen opaštujie on 21, livvinkarjalan opaštujie on 18 ta varšinaiskarjalan opaštujie on 31. Kaikkieh koulušša on yli 920 opaštujua ta 60 opaštajua. Joka vuosi laitokšeh tulou nuorie spesialistija, kumpaset jatetah
omua toimintua opaštajan ammatissa. Vain viime kolmen vuuvven aikana 13 opaštujua lopetti koulun kultametalin kera.
