Keppokävelendy on juurdumas Karjalah. Enimytteh se koskou naizii. Liikundu yhtes virittäy paginoi da yhtevyksien piendöi.
Hengi ihastuu, konzu näet Vieljärven kyläs endisty enämbän keppoloinke kävelijiä naisjoukkuo. Se on tervehellizen elaijan merki. Rahvas lekutah – elaigu jatkuu. Naizet kuuzi-seiččei hengie joukos astutah Kinnermän kylähpäi, Jänöiselläl, suureh juamassah.
Vieljärven Ruisniemen naisjoukos on kuuzi hengie. “Kaksi opastajua, kaksi liäkärii da kaksi yksinästy soittuo”, nagretah omua iččie eläkkehelolijat naizet. Nävytäh hyö nuorinnu da kirmielöinny, silmät läpetetäh. Erähät heis käveltäh keppoloinke jo seiččemetty talvie, erähät vai enzimästy.
– Avoi voi, älgiä vai kirjutakkua meijän sportuičendoi. Muga, nareko keppoloinke kävelemmö, ken kui voimmo.
“Yhtelläh, tie avavuu astujale”, mainiččou Valentina Nifantjeva. Häi kolmekymmen vuottu ruadoi Vieljärven souhozas da on hyvin tuttu specialistu vieljärveläzih niškoi. Häi harrastau keppokävelendiä nellätty talvie da vie sen ližäkse hiihtäy. “Mennyt talven minä astuin Ruisniemespäi Jänöiselgässäh viizikymmen kuuzi kerdua. Se rodieu matku Petroskoissah da järilleh Vieljärveh da vie ližäkse puolimatkua Priäžässäh!”, nagrau Valentina F’odorovna.
– Tiettäväine, tervehys parembi on, lujendau L’ubov’ Filippova, bol’ničan endine ruadai. – Mieliala kohenou, syöndyhimo da verenpaine normah tullah, dai päivy teriämbi menöy. Nivelih niškoi ylen hyvä on. Lekkuo pidäy, kaikile sanon, lekkuo pidäy!
Kaikil naizil jallas ollah suomen Kuoma-firman mustat termokengät, net ei olla libiet da jygiet. Kengii hyö tilatah Suomespäi, suadih ostua iče libo tuodih omat. Puuttuo sportujoukkoh ei ole ylen kebjei, mindäh sendäh naizien keskes ollah omat siännöt da paginat. Midä enämbi mostu naisjoukkuo on kyläs, sidä aktiivizembi kylä on. Käveltes paistah elaij as, hiälöis, omis perehis. Keppokävelendy piettelöy naizii hyväs kunnos da kuris: kerran on paistu vastavuo tiešuaral yhteltostu čuasul päiväs piäliči – ole sreppu da tiijä lähtie koispäi! Pattevus ei petä.
Teksti ta kuva: Natalja Antonova, Oma Mua 21.12.2022
