On kuolluh karjalaine kirjuttai da kiändäi Zinaida Dubinina
Pakkaskuun 24. päivänny lähti toizele ilmale karjalaine kirjuttai da kiändäi Zinaida Timofejevna Dubinina.
Zinaida Dubinina on roinnuhes 2. elokuudu vuvvennu 1934 Lumatjärven kyläh, eli Kotkatjärvel. Händy tundiettih nerokkahannu kirjuttajannu, runoilijannu, kiändäjänny da opastajannu, oman rahvahan da oman kielen rohkiennu puolistajannu.
Zinaida Timofejevna on hyvin tundiettu ristikanzu, karjalazet rahvas korgiesti arvostetah hänen neruo da kumardutah Zinaida Timofejevnale hänen kiännettylöis “Kalevalas”, “Uvves sanas”, “Biblies lapsile”. Omas ruavos kuulužu karjalaine kiändäi oli palkittu Ven’an Pravosluavnoin Kirikön kiitändykirjazel da rynnäsmerkil. Zinaida Dubininal on piässyh ilmah kolme runokogomustu: “Silmykaivoine”, “Valgei koivikko” da lapsile tarkoitettu “Minun livvin linduzile”. Joga runos tunduu kirjuttajan suvaičus omah muah, kibei da abei hyllättylöis kylis da mualois, omas čomas da helies unohtuksih jiännyös karjalan kieles. Zinaida Dubininan mielet da tuskat karjalan muan nygytilas on kerätty suureh kogomukseh, kuduan piästi ilmoih vuvvennu 2013 Karjalan Kielen Seuru.
Musto Zinaida Dubininas rubieu elämäh ilmazen ijän hänen runolois da kiännöksis. Jumalan armoloih.
On siirdynyh tuonilmazih karjalaine Akilan Iivan
Pakkaskuun 22. päivänny 90 vuvven ijäs siirdyi tuonilmazih kuulužu karjalaine mies, oman rahvahan puolistai da karjalan kielen akkiloiččii Ivan Aleksejevič Akimov.
Akilan Iivan oli rodivunnuh Kolatsellän kyläh. Mies oli enzimäzenny, ken rubei sellittämäh raadivos karjalazien azieloi da omis lähetyksis rubei pagizemah rahvahanke karjalakse. Hänen enzimäine karjalankieline lähetys kesti 20 minuuttua da oli työtty ilmoile kevättalvel 1968. Pitkän aijan Akilan Iivan oli Karjalan televiidenien da raadivon kanzallizen toimituksen johtajannu.
Akilan Iivan oli Karjalan Rahvahan Liiton perustajii, kehitti karjalazien kul’tuurua ezmäi Ven’an puolel, sit Suomeh muutettuu sie jatkoi omua ruaduo Suomen puolen karjalazienke. Kerras yhtes pagizuttelus jo Suomes eläjes Akilan Iivan nevvoi nuorile, ket tahtotah puolistua omua rahvastu da kieldy: “Nevvozin ainos suaha selvile azien olemus, sen pričin. Ainos pidäs mustua, ku etnine identitiettu on kehitykses olii protsessu, kudamah vaikutetah mennyöt, nygyzet sego tuliet eloksen menot. Nuorile pidäs suaha kaikenpuolistu tieduo karjalazien elokses. Opastanduohjelmih pidäs suaha enzisijas karjalazen rahvahan kul’tuurua da histouriedu. Voibigo pidiä kunnivos ristikanzua, kudai ei tunne omii juurii?”
Jälgimäzih päivissäh Akilan Iivan oli “Oman Muan” lugijannu. Igäine musto Kolatsellän miehele.
Akilan Iivanua kaimatah jälgimäzeh matkah Suomen Vantaa-linnas. Ližiä tieduo voibi suaja Maksim-bunukal turenkov@hotmail.com
