Jelenan kera karjalakši: Lieksan paginapertin enzimäne vuozi
Piäkuva: Lieksan paginapertti on nygöi ruadan yhen vuuven. Kuva: Elena Rapa
Lieksan paginapertti on nygöi ruadan yhen vuuven. On ollun positiivine surpriisa, kuin äijän rahvasta perttilöissä on käynyn.
Konza mieleh juohtu ehoittua Suojärven Pidäjäsebralla, voizigo sežo Lieksah (da Nurmekseh) organiziiruija paginapertin, ei ollun nimidä tieduo kuin äijän rahvasta tulis keralla. Piäzimmä zavodimah Lieksan paginapertin elokuussa. Miun lizäksi vedäjiksi ruvettih suistamalaisjuurine Minna Ahokivi dai Lieksan Suojärveläiset ry:n paginanvedäjä Pentti Tapanen.
Edukyndeh ennein enzimäistä kerdua duumaičimma da toivoimma, što toinah meidä tulis keralla vähimikseh viizi ristikanzua. Ga oli suuri ilo, kun enzimäzellä kerralla vuittivujua tuligi keralla 18, da sengi jälgeh ozanottajua oli joga kerdua 10 libo enämbi! Se oli positiivine surpriisa da oli tovengi ilo dogagie, što paginaperttie tarvitah suurembien linnoin lizäksi i pienemmissä linnoissa, kuin Lieksassa.
Lieksassa on oma karjalane yhtehizö, kumbazesta onnakko suurimmalla vuitilla rodn’at tullah Suojärveldä. Äijät ei kuiteski piässä enämbi käyttämäh kieldä, sentäh kun ei ole nikedä kenen ker paissa, eigä ni kohtua kussa paissa, kun rahvahanopissossagi ei tarita karjalan kurssua. Sen periä kieli buitto unohtuu hillakazeh. Erähät ollahgi tuldu Lieksan paginaperttih keralla ”vain kuundelemah kun ei malteta paissa karjalaksi’’ libo ’’vain kuundelemah sentäh kun kieli on unohtun kun sidä ei piäze käyttämäh’’. A kun kodvane on kuunneldu da jogahizella on vuoro sanella omat dielot, sit erähät kuundelijat ollahgi allettu paissa ihan täyvelleh karjalaksi! Moizet kodvazet, konza huomuat kuin se peitossa olija kielinero havaččeuduu rahvahassa, net lämmitetäh mieldä.
Hos Lieksan paginaperttie on reklamiiruittu Suojärven Pidäjäsebran somessa da vuittina Pidäjäsebran toimindua, pidäy mainita vielä, što ihan kaikin karjalankielizet da hyö kumbazilla karjalan kieli kiinnittäy mieldä suahah tulla keralla, eigä vuittivundah vuajita Pidäjäsebran ozanottajutta. Miän paginaperttih ongi löydän kai karjalan murdehet: erähät paissah vienankarjalaksi, erähät suvikarjalaksi, erähät livvinkarjalaksi da sit olemma vie myö vedäjät, ket pagizemma vähäzel kaikkie murdehie yhessä. Joukkoh syndyy i eriluadusta kielenmalttajua: toizet paissah ilmain probliemua, toizet vasta harjauvutah pagizemah. Erähät paissah enämbi suomeksi libo suomie abukielenä käyttäjen, ga yhelläh tunduu, što kaikilla on himuo opastuo kieleh.
PAGINAPERTTIE ON PIETTY Lieksan pravoslaunoissa prihodazualassa. Joga kerdua paginat on zavodittu koufeilla-čuajulla i millätahto magiella libo suolazella syömizellä. Tiemana meilä on enzimäzen vuuven aigua ollun esimerkiksi sygyzy, raštava, muuzikka, himoruavot, karjalankieline kirjallizus da kezä. Olemma paissun kuulumizie, pajattan karaokieta karjalaksi, da eräs kerda keviällä myö vedäjät otimma keralla karjalankielizie kniigoi, kumbazie tutkimma yhessä. Jogahine sai sežo vallita yhen kniigan da lugie iäneh lyhyččäzen vuitin. Erähät vie otettih kniigua laihinahgi. Paginoin lizäksi olemma kizannun yhessä Adaman gruunu -muistokizua dai sellitä sana -kizua (ili Aliasta karjalaksi). Kizat ollah oldu paginaperttiläzillä mielehizet, sentäh kun niijen kautti on vesseliä opastuo kieleh.
Miun mieldä on äijälti lämmittän da ilahuttan se, što olemma voinun yhessä luadie Lieksah kohan, kumbazeh voibi keräydyö pagizemah libo pakajamah karjalaksi. On moine tundo, jotta olemma suanun levitettyö rahvahah viritystä tulla keralla, da onnakko olemma rohkassuttan sežo pagizemah dai opastumah liziä. Moista positiivista kogemusta miula himottau jagua ielläh, andanou se viritystä toizillagi omih ruadoloih da projektoih karjalan kielen keralla.
Loppuh sanelen vielä suuret passibot Karjalan Sivissyssebralla, kun oletta tugen Lieksan paginapertin ruandua! Lieksan paginapertit jatutah sygyzyllä. Tiijotusta voibi sebrata Instagramissa @suojarvelazet libo Suojärven Pidäjäsebran uuvella nettasaitalla, suojarvi.fi.
Kirjuttan: Ravan Jelena
Jelenan kera karjalakši -blogipalstan ideja on lisätä ellennyštä šiitä, jotta karjalan kieli pätöy hoš mih kontekstih ta karjalakši voit kirjuttua hoš mistä muan ta taivahan välillä. Blogipalstan kirjutukšien tiemat vaihellah. Instagram: @jelenankera
Luve lisyä: Jelenan kera karjalakši Uutisčupušša