Elävä Kalevala -kilba virittäy nuorie luadimah omie sellityksie rahvahalliseepossasta
Piäkuva: Elävä Kalevala -kilba kuččuu 11–19-vuodizet nuoret sellittämäh Kalevalua nygypäivän nägökohasta. Kuva: Jenna Kunnas/SKS
Suomelazen Kirjallizuon Sebran (SKS), Kalevalasebran da Muamonkielen opastajien liiton järjestämä kilba kuččuu 11–19-vuodizet nuoret sellittämäh Kalevalua nygypäivän nägökohasta. Kilvan piäpalkindo on 500 euruo, da parahat tevokset piässäh ezillä Gallen-Kallelan Muzein ozutteluh.
Ket ollah nygyaijan ainot, väinämözet, kullervot da louhet? Midä nygysampo jauhou da kellä? Mi Kalevalassa virittäy libo ärkittäy?
Elävä Kalevala -kilvassa keriämmä 11–19-vuodizien nuorien sellityksie Kalevalasta da sen huahmoloista nygypäivän nägökohasta. Kalevalan huahmoja ollah muga ihmishuahmot kui esimerkiksi sampo, luonnottaret, kuldaneido dai hiijen hirvi. Inspiratsieda voibi eččie SKS:n Kalevala-opassundasivussolda: https://tietava.finlit.fi/krl/kalevala.
Nuoret voijah vuittivuo kilbah luadimalla lyhyččäzie videoloi, podkastoi, valokuvie libo kuvataidotevoksie. Tevoksien pidäy olla ičen luajittuloi, da ne voibi luadie sežo joukon kera. Kilbaruavot voibi luadie suomeksi libo ruočiksi.
Kilbaruavot voibi työndiä 28.2.2026 männessä adressassa https://www.finlit.fi/elava-kalevala/. Palkičemma kolme parasta kilbaruaduo: 1. palkindo 500 €, 2. palkindo 300 € da 3. palkindo 200 €.
Kilbaruadoloista luajitah ozuttelu Gallen-Kallelan Muzeih Espuoh sygyzyllä 2026 da niilöi jullatah SKS:n digitualizella Kalevala-sivussolla. Kilbaruavot arhiivoijah SKS:n arhiivah.
Kilba on vuitti Kalevalalla annettuh Europan kulttuuraperindötunnukseh liittyjiä hankehta. Valdakunnallizen kilvan järjessetäh Suomelazen Kirjallizuon Sebra, Kalevalasebra da Muamonkielen opastajien liitto.
Kilba pruaznuiččou sežo Elias Lönnrotan enzimäzen Kalevala-painoksen, Vanhan Kalevalan (1835) ilmah piäzennän 190. vuotta.
Palkinnot juatah oraskuussa 2026 SKS:ssa järjessettävässä tapahtumassa.
Luve liziä kilvasta: https://www.finlit.fi/elava-kalevala/
Vastavusohjavot opastajilla: https://www.finlit.fi/elava-kalevala-vastausohjeet/
Lizätiijot: SKS:n viessindä, p. 0201 131 231,
Kilpailukutsu suomeksi.
Tiedotteen käännös karjalaksi:
Elena Rapa
Luve lizäkse:
https://uutiscuppu.karjalansivistysseura.fi/hallinta/uusi-verkkojulkaisu-tarjoaa-tietoa-kalevalasta-nuorille-ympari-euroopan-myos-karjalaksi/