Sanaston luajindu on tärgei vuitti karjalan kielen elvytändiä da kehitändiä. Muailman muuttujes da kielen kehittyjes kaikile kielile, eloivoimazilegi, pidäy uuttu sanua, ga varavonalazen kielen kohtal sanastoruado on alalleh keräl, joga kohtas da joga päiviä.
Sen-tämän sanan voit kebjieh mugavuttua libo ottua laihinakse paistes, ga konzu kieleh pidäs läs joga paginas luadie midätahto uuttu, se voibi jo vaikuttua uuzien pagizijoin mahtoloih ruveta käyttämäh sidä. Enne kaikkie tämä probliemu koskou eloksenaloi, kudualoil perindöllizesti ei ole paistu karjalakse.
Päivännouzu-Suomen yliopiston blogas on jullattu jogahizen pagizijan avukse da luadijoin omakse tuvekse azuttuloi sanastoloi jo vuvves 2021 algajen. Täs lyhyččäzes tekstas ozutellah erähii niilöis.
Detektiivusanasto da kirjalližussanasto
2025 on karjalankielizile dekkuloin vuozi, sendäh gu detektiivuromuanoin karjalankielizii kiännöksii jullatah tänä vuon kaikkiedah kolme!
Maria Kuisminan sanastokursal luajittuh dektiivusanastoh livvinkarjalakse on kerätty Häi eli pajol -dekun kiändämizen aigua luajittuu sanastuo ezimerkivirkehienke. Sanastos lövvät ezimerkikse sanat amfetamiinupakiettaine da dielonkačondanprocessu suvvos (oikeudenkäyntiprosessi). Sanakse, juuri täs sanastos da kiännökses ezmästy kerdua eroitettih karjalakse toine toizes tapandu (tappo) da piäniekoičendu (murha)!
Linku sanastoh:
Elvytyksen blogas on jullattu sežo Katerina Paalamon luajittu suuri kirjalližussanasto, kuduas kačellah kui kirjalližuon eri tiippoi, mugai erähii kirjalližuontutkimuksen peruskäzittehii suvikarjalakse.
Linku sanastoh:
Tekstu: Niko Tynnyrinen
Luve ližiä:
Karjalankieline sanasto joga tilandeheh, oza 1: Kazvossyöjän sanasto
Karjalankieline sanasto joga tilandeheh, oza 2: Opaštujan eloš -sanasto
