Uutiset

Abja-Paluoja rodih suomelasugrilazien piälinnakse

Kirjoittanut: Toimitus
Julkaistu: 4.2.2021
Asiasanat: uutiset

Tuhukuun 13. päivänny roitah suomelas-ugrilazen muailman kul’tuurizen piälinnan avajazet. Tänävuon se on Abja-Paluoja, Estounien kohtaine. Piälinnakse se vallittih kezäkuus. Loittolazet sugurahvahat voijah yhtyö avajazih internetači.

Suomelas-ugrilazen muailman kul’tuuristu piälinnua vallittih kaheksa kerdua, kaheksa vuottu peräkkäi. Tämä dielo kuuluu suomelasugrilazien rahvahien yhtesruadoh da yhtespyzyndäh. Moizen dielon – vallita joga vuottu kul’tuurine piälinnu – ehoitettih nuorižoliitto MAFUN da Karjalan tazavallas olii Kandurahvahien kehityksen kannattai keskus sih niškoi, ku suures mieros parembi tutas suomelas-ugrilazien eländykohtii da taboi, ku net kohtazet suadas uuttu potkahtustu kehitykseh da rahvahien kul’tuurizien oigevuksien kannattamizeh.

Suomelas-ugrilazen muailman kul’tuurizennu piälinnannu tässäh oli seiččei kohtua, täs čotas on meijän pohjaine, vienankarjalaine kyläine Vuokkiniemi, kudai vallittih moizekse vuvvel 2017. Udmurtoin Bygi, setokazien Obynitsa, vengroin Iskasentdjord’ da Vesprem-linnu, marilazien Unčo, Baškiirijes eläjien niittymarilazien Miškan kylät puututtih kul’tuurizekse muailmakse omua čomevuttu, kuulužuttu da perindölöin säilytändiä.

Kul’tuurizen piälinnan programmah näh sanellah avajazis. Tiijos on se, ku piälimäzenny pivonnu rodieu kezäfestivuali “Mulgi 2021 – “Sia ja mia sankenkuun” (karj.“Sinä da minä yhtes”).

Mul’gilazet kučutah karjalazii avajaizih. Sih niškoi pidäy ennepäi kirjuttua organizuattorale Kerstin Reile kerstin@mulgivald.ee da ilmoittuakseh.

Abja-Paluoja

Abja-Paluoja on Estounien lounazel, Viljandimuan ujezdal, Latviehpäi vierii kyläine, kudamas eläy vähästy enämbi tuhattu sadua ristittyy. Sie paistah muite muis mul’gin murrehtu. ”Mul’gikse” hyö sanotah kurkuliloi, bohattoi. Mul’gin mualoi pietäh vägevinny, täs nygöigi äijin kazvatetah vil’l’ua. Čoma luondo, puhtahus, vahnat kiriköt, hyvin kehitetty muatalovus, käziruavot da ruadonerot, rahvahien tavat da paginluadu ollah Abja-Paluojan rikkahuksii.

Teksti: Natalja Antonova, Oma Mua 3.2.2021
Foto: Womanadvice.ru

Lue nämäkin:

Nedälin 21 karjalankielizet uudizet Yle Areenassa

Nedälin 21 karjalankielizet uudizet Yle Areenassa

Nygöi viennouzendat ollah jo alevuttu da vienpindu ei ole enämbiä muga korgiel.Luonnonvarakeskus ennustau, gu syömizien hinnannouzendu alevuu vuvven lopul da syömizet huovistutah.Ven’alpäi mulloi muutettih Suomeh selgiehgi aijembua enäm.Suomes iellehgi tovendetah...

Kiestinkin šeuvun kertomušperinnehtä

Kiestinkin šeuvun kertomušperinnehtä

Karjalan tietokeškukšen tietomiehen ta folklorin tutkijan Marija Kundozerovan valmistama Kiestinkin šeuvun kertomušperinnehtä -kirja on painettu. Karjalan tašavallan Louhen piirin šekä Murmanskin alovehen Kantalahen piirin kertomušperinnehtä on esitetty uuvvešša...

Mikä on Uutisčuppu?

Uutisčuppu – Uudisčuppu on Karjalan Sivistysseuran uusi ajankohtaiskanava. Julkaisemme tällä sivustolla kiinnostavia uutisia ja tietoa tulevista tapahtumista.

Tilaa uutisviesti

Tilaa sähköpostiisi ilmoitukset uusista artikkeleista.