Piäkuva: ”Mitähän mie tulijakši kaččosin, min tv-šarjan alottasin?” Kuva: Pixabay
Tv-šarjojen šuvaiččijalla on toičči jykie löytyä uutta paššuajua ta mieltäkiinnittäjyä kačottavua, konša mielehini šarja on kačottu loppuh. Šentäh keryän täššä kirjutuksešša tukkuh šarjoja, kumpasie voin iče rekommenduija kačottavakši.
Issut divanalla. Olet juštih kaččon loppuh minnih tv-serialan, kumpaista šuvaičit äijän. Nyt on vähäsen tyhjä tunto ta smietit, mitähän mie tulijakši kaččosin, min tv-šarjan alottasin? Ei himottais ruveta kaččelomah šuoratoistopalvelun taričusta läpi ta smietit kaččositko vain uuvveštah minnih jo tuttavan šarjan, kumpasen olet kaččon jo ainaški kakši kertua. Kuuloštauko tuttavalta?
Miula on juuri nyt šama tilanneh. Ečin uutta šarjua ičellä kačottavakši ta en tahtois taipuo tuaš kaččomah mäne tiijä kuin monetta kertua Gilmoren tyttöjä. Hoš Gilmoren tyttölöin tapahtumie ta ylen ravieta pakinua onki vesselyä, turvallista ta mukavaista kaččuo, himottais tiettäväini kaččuo mitänih uuttaki. No eččiessä šiitä juolahti mieleh, jotta toinah kennih toiniki smiettiy mitä tulijakši kaččois. Šentäh tahon tällä kertua rekomenduija eri sortin tv-šarjoja, kun šiitähän voit kellänih olla apuo. Ielläh niät kerron erähät miula mielehiset tv-šarjat ta vieläi smietin, kuinpa erähien šarjojen nimet kiännyttäis vienankarjalakši.
Kepien teinihupetukšen ta druaman šuvaiččijalla
Miula ičellä šytämeššä on šuuri kohta muka kučutulla ’’teinihupetukšella’’. Kiinnittänöy mieltä kepie kačottava, erimoiset puaravälikuvijot ta ristikanšoin välini druama, ta toičči muotiki, totta šie tykkyät tulijista ehotukšista. Tämmöistä kepietä kačottavua on esimerkiksi jo mainittu Gilmoren tytöt, Emily in Paris, Skam, My life with the Walter boys (karj. Miun eloš Walterin prihaččujen kera) ta Xo, Kitty. Pitäy vielä mainita Young Royals (karj. Nuoret kuninkahalliset). Še on ruočinkielini seriala, kumpani kertou kuvittehellisešta Ruočin prinssi Wilhelmistä, kumpasella pitäy skandualin vuokši männä Hillerskan internattiopaššušlaitokšeh. Tämän šarjan piäošašša on kaksi prihua ta keskehini tiema on kielletty rakkahuš.
Teinihupetukšeh lašen niise Gossip Girl ta Ginny & Georgia -programmat, hoš niissä on keralla jo dramuattisempuaki juonta. Šiitä Täyvelliset naiset ei onnakko enämpi ole ihan šitä teinihupetušta vain lähempänä jo muilaserialua, ta šiinä piäroulissa ollah jo aikuhiset naiset. Še kuiteski on niise ollun miula mielehistä kačottavua: komedieta, puaravälikuvijoja, rikokšie ta druamua šamašša paketissa!
Tykännet musiikkie, voit olla vesselä seprata musikali- ta komedieseriala Gleen tapahtumie, kumpasen keskivöššä ollah opaštujat, oman identitietin eččimini ta showhora. Ta ollou šiula liijaten romantiekka mieleh, šiitä hyvä valinta vois olla Bridgerton, kumpani čukeltau 1800-luvun alun Englantih ta seprapiirilöih. Šiinä serialašša voit kuulla nykyajanki musiikkie klassiseh luatuh šoitettuna. Kun romantiekka tuli mainittuo, pitäy noštua eših vielä korealaini druamašarja Crash landing on you, kumpasešša piäroulissa ollah pohjaiskorealaini mieš ta šuvikorealaini naini – ka tästä korealaisešta šarjasta pitäy šamalla antua varotuš, jotta kaivelethan näštyykit eših!
Fantasijastarinoin šuvaiččijalla
Teinihupetukšen ta moisen kepien kačottavan lisäkši miula erityisesti on mieleh fantasija. Tiettäväini enšimmäisenä mieleh tulou Game of thrones (karj. Prestolakisa). Tämä onnakko on jo monella tuttava tv-šarja, ka en voi kuin šanuo, jotta olen ihan katehellini hänellä, ken ei tätä vielä ole kaččon. Lentoliuškuo, ritarie, loiččuo, kolmišilmäni korppi, šeikuičentua, kisua prestolašta ta pohjasešta tulija uhka – ta äijä, äijä muutaki! Serialašša on toičči ešillä niise jykietäki kohtavušta ta tiemua. Miušta tämä on ylen hajukaš seriala, hoš jälkimäiset kauvet ei onnakko oltuki šuurella ylehisöllä (ta miula) mieleh. Täh šarjah pitäy kuiteski heti alušta alkuan keškittyö puutillah, jotta piäšet keralla ta ymmärrät ken on kelläki rotn’ua ta mi yhtevyš hahmoloilla on. Pitäy niise šanuo, jotta hoš enšimmäiset ošat ei vielä šuaha šilma matkah, pisy tirpaččuna ta kačo ielläh. Še parenou kaiken aikua! Tällä šarjalla muiten on niise šivušarja House of the dragon (karj. Lentoliuškun rotn’a), kumpani kertou aijašta ennein Game of thronesin tapahtumie. Ta uutiset kerrotah, jotta lisyä šaman muailman šarjua on vielä tuloššaki.
Toisena juohtuu mieleh vähän kepiempi fantasiešarja, Once upon a time (karj. Olipa kerran), kumpasešša oikie eloš ta šuarnamuailma ševotutah. Täššä serielašša on keralla tuttavua hahmuo esimerkiksi Disneyn kinoista, Ozan muailmašta ta Grimmin vellekšien starinoista. Mie iče olen kašvan Disney-kinoja kaččuon, niin tämä seriala kiinnitti miun mielen heti.
Kolmantena tulou mieleh Stranger things (karj. Imminkummaset tielot), kumpani toinah enämpi mänöy scifin ta mistiekan puolella, kuin fantasien. Serialan tapahtumat šijotutah Yhyšvaltoih, Hawkinsih. Serialan alušša yksi piähenkilöistä, 12-vuotini Will Byers, katuou ta šen jäleštä rupieu pal’l’aštumah muutaki imminkummaista. Hoš täššä serialašša on niise sruastin piirtehie, himottau šitä vähä varačullaki kaččuo ielläh mieltäkiinnittäjän mistiekan vuokši. Täštä tulou tänä vuotena viiješ ta šamalla viimini kauši.
Konša himottau nakrua
Toičči et taho keškittyö monimutkasih s’užettiloih, a tarvičet mitänih nakrattajua kačottavua. Šiitä hyvä valinta vois olla esimerkikši Frendit tahi Moderni pereh. Niijen ošat ei olla liijakši pität ta ušon, jotta piäšet nakramahki. Kolmaš hyvä ehotuš komedieprogrammašta olis Lucifer, kumpani kertou, no, iče piessašta, ken muuttau Los Angelesih šentäh kun on terštautun olomah manalan čuari. Serialašša Lucifer avuau yöklubin ta tuttavuštuu piäniekkudetektiivah, ili keralla on šyvempyäki s’užettie ta rikokšie. Jälkimäisenä komedieloista pitäy mainita Wednesday (karj. Serota). Še on niise hyväččäini komedie, a kuiteski kauhulla mavuššettuna, ta šiinäki on jo tarkempah seprattava juoni.
Konša tahot toimintua ta trillerie
Konša tahot kaččuo trillerie, on esimerkikši La Casa De Papel, šuomekši Rahapaja, paššuaja seriala. Še on espanjalaini šarja, ta še kertou rikollisjoukošta, kumpani rosvuiččou Espanjan kuninkahallisen rahapajan. Hoš rosvot ei tavallisesti olla šuvaittuja, tämä joukko voittau rahvahan puolellah. Ta tykännet Rahapajašta, šiitä šuatat tykätä vieläi šen šivušarjašta Berliinistä, kumpani kertou ajašta ennein Rahapajan tapahtumie.
Jälkimäisenä vielä pitäy mainita Last of us. Tämä šarja peruštuu videokisah, kumpani on julattu vuotena 2013. Tämä seriala kertou post-apokaliptisešta muailmašta, kumpasešša šieniperäni tarttuja läsintä on levinnyn rahvahah, min vuokši šuuri vuitti inehmisistä on muuttun varattaviksi hirviččylöiksi. Tapahtumat šijotutah Yhyšvaltoih, kušša rahvaš eletäh tiukan kaččehen alla karantiinialovehilla tahi iččenäisešti muuvval’l’a. Šarjašša piärouliloissa ollah peittokulettaja Joel ta 14-vuotini Ellie, kumpani onki immuuni leviejällä tauvilla. Tämä šarja šuau teräväh jatkuo, šentäh kun 14.4. alkau šen uuši kauši.
Karjala-šuomi šanašto
druama – draama
fantasija, fantasie – fantasia
internattiopaššušlaitoš – sisäoppilaitos
juoni, s’užetti – juoni
kauhu, sruasti – kauhu
kauši, sesona – kausi
komedie – komedia
lentoliušku – lohikäärme
muilaseriala – saippuasarja
oša – jakso
showhora – showkuoro
šivušarja – spin-off
piähenkilö, piärouli – päähenkilö
piäniekkudetektiiva – murhaetsivä
teinihupetuš – ’’teinihömppä’’
tv-šarja, tv-seriala – tv-sarja
Kirjuttan: Ravan Jelena
Jelenan kera karjalakši -blogipalstan ideja on lisätä ellennyštä šiitä, jotta karjalan kieli pätöy hoš mih kontekstih ta karjalakši voit kirjuttua hoš mistä muan ta taivahan välillä. Blogipalstan kirjutukšien tiemat vaihellah.
Instagram: @jelenankera
