Vuvvel 2013 oman ruavon alganuh Karjalan Kielen Kodi-yhtevys työndi mennyöl nedälil kirjazen Karjalan tazavallan virgumiehil. Karjalan kieldy akkiloiččii da kehittäi liitto kyzyy abuu tazavallan b’udžietaspäi.
Kirjazen suajat ollah Karjalan piämies Artur Parfenčikov, Zakonoinhyväksyndykerähmön paginanvedäjän sijahine Ol’ga Šmajenik, opastuksen ministru Roman Golubev, kanzallizen da alovehellizen poliitiekan ministru Sergei Kisel’ov, Priäžän piirin piämies Andrei Orehanov da Vieljärven kylän piälikkö Aleksandr Čugai. Karjalan Kielen Koin paginanvedäjän Ol’ga Gokkojevan ualkirjutetus kirjazes kyzytäh alallistu abuu Koile. Yhtevyksen tarbehien mugah abuu pidäs metodistan palkattuh ruadoh, muanvuogruhinnan pienendämizeh da pitkyaigazeh kieliruadoh. Karjalan Kielen Kodi kyzyy virgumiehii kehittämäh juuri mostu sistiemua, kudai vois auttua Koin kehittymizes edehpäi.
– Karjalan Kielen Kois vois luadie uvvet ruadokohtat. Äijy midä vois luadie kielen hyväkse, ga ilmai valdivollistu abuu eistymisty edehpäi ei voi tulla. Olemmo valmehet yhtes tazavallan virguniekoinke paista karjalan kielen iellizes kehitykses da omas ruvos, suau lugie yhtevyksen sivustol kirjazen ual.
Täkse aigua Karjalan Kielen Koin jen’gutagukset ollah lahjoittajien, projektoin vuitit, yhtevykseh kuulujien ristittyzien omat varat da Koin lunnastetut varat, sanommo, piirualoin myöndyjen’gat da maksullizis ruadopajis suavut jen’gat. Karjalan Kielen Kois ruadau läs kymmendy kerhuo, yhtevykses hommatah opastundoi loittuopäi, sanommo, zooman da skypen kauti. Koin piälimäzii jen’gumenoloi on kielipezän da školaniekoin ildupäivykerhon piendy. Sih niškoi yhtevys palkai viizi täyzipäivällisty ruadajua. Koin aktivistat ollah sidä mieldy, ku kerran yhteskunnallizet liitot täytetäh valdivollistu poliitiekkua, hyö voidas suaha valdivollistu abuugi.
Teksti: Natalja Antonova, Oma Mua 28.10.2020
Foto: Kirjazen täyzi versii on pandu Koin sivustol Vkontakteverkoh. Sen ližäkse yhtevyksen aktivistat luajittih internetkyzelyn, kudamas kyzytäh rahvahal, midä mieldy hyö ollah, pidäygo Karjalan Kielen Koile tädä jen’guabuu vai tazavallan b’udžietas on muudu tärgiembiä menuo.
