Konša miun luo šuorittih tulla yštävät Kazanista, ni mie piätin kostittua heitä karpalomuššilla (višpipuurolla).
Vualienruškie jälkiruoka niin miellytti miun kaverija, jotta hyö kirjutettih ičellä še resepti ta jo monta kertua iče on valmissettu muššie Kazanissa. Ehotan teiläki karpalomuššin reseptin.
Ota:
– Karpaluo (voit ottua toisie pohjoismarjoja)
– 1/2 stokanua šokeripeskuo
– 8 lusikkua mannua
– 1 litra vettä
Karpalot puhissa ta pane šiiviläh.
Pane kattila vejen kera tulella, kiinitä šiivilä marjojen kera kattilan piällä niin, jotta hoti puolet marjat ois katattu vejellä.
Vesi alkau kiehuo ta marjat ruvetah hautumah. Konša marjat tullah pehmeiksi, šurvo ne pienellä petkelellä tahi lusikalla. Marjamehu rupieu valumah kuumah veteh ta še tulou ruškien värisekši.
Marjakuoret ota pois šiivilän kera. Još marjavejellä ilmeštyy vuahti, ota še lusikalla pois.
Lisyä šokerie mavun mukah. Tällä morššilla keitä mannahuttuo. Lisyä mannua moršših varovašti ta aina hämmennen. Keitä kakši minuuttie, šammuta tulet ta jätä kannen alla 10 minuutiksi. Šillä aikua ota šekoituškoneh, valmissa tasa vilun vejen kera, jotta šiih šopis huttumal’l’a. Tarkissa, jotta vesi tasašša aina ois vilu.
Piekšä mannahuttuo viisi-šeiččemen minuuttie, kuni še ei tule kouhakakši. Ota huomijoh, jotta piekšämisen aikana mušši muuttau oman värin ta tulou vienokši.
Kua annokšien mukah ta pane stolalla. Još muššie tuli enämpi, mitä tarviččou, voit kuatua šitä mal’l’ah ta panna jiäškuappih.
Šemmoista jälkiruokua tavallisešti šyyvväh maijon tahi sliuhkan kera.
Hyvyä ruokahaluo!
Teksti: Jekaterina Sem’onova, Oma Mua 11.9.2024
Kuvat: Viena-šeura
