Kuva: Gerta Remšu on Kalevalan piirin kunnivokanšalaini.
Tuiskukuun enšimmäisinä päivinä Gerta Nikolajevna Remšu juhliu omua 85-merkkipäivyäh.
Kalevalan piirissä Gerta Nikolajevnua monet tunnetah, kunnivoitetah ta tykätäh. Tiijetäh musiikin harraštajana, kunnivoitetah folkloritaijon tietäjänä ta propagandistina, tykätäh hyvänä, hienotunnollisena ta käršivällisenä naisena.
Vuotena 1964 Gerta Remšu lopetti Petroskoin musiikkiopisson, šai kuoronjohtajan diplomin, miäräykšen mukah tuli töih Kalevalah ta niin ni jäi elämäh tällä laulušeuvulla.
Enšin Gerta Nikolajevna ruato musiikkiohjuajana pos’olkan päiväkotiloissa. Hiän aina innolla vietti harjotteluja lapšilla ta järješti heilä musiikkipruasniekkoja. Šiitä Gerta Remšu alko ruatua piirin Kulttuuritalošša, missä hänen ammatillisuš ta kuorokollektiivien johtajan nero avautu täyšin miärin.
Gerta Nikolajevnan alottehešta 1980-vuosien alušša Kulttuuritalošša oli peruššettu Väinölän lapšet -folklorikollektiivi. Še tuli kaikkien konserttien korissukšekši kuin piirissä, niin ni tašavallašša. Kollektiivi voitti monešša kilpailušša, toisien lisäkši ni vietetyššä Neuvoštoliiton Arteklapšienleirissä.
Vielä yksi tunnettu lapšienkollektiivi – poikien kuoro – peruššettih Kalevalašša Gerta Remšu ta Jevgenii Prohorov. Melkein 60 kalevalalaista poikua harjotteli kahen nerokkahan pedagogin ryhmäššä. Ta voipi vain kuvitella kuin äijän voimua ta käršivällisyttä tarvittih opaštajat, jotta järještyä rauhattomie poikie mahtavah kollektiivih ta hyvin esittyä heijät lavalla!
Šamoin Kalevalan piirin eläjät tiijetäh ta muissetah toisieki yhtyvehie, kumpasien ohjuajana oli Gerta Nikolajevna: Kulttuuritalon naisien vokaliryhmä, rahvahan Kalevala-folklorikollektiivi, akatemini Elegijakuoro.
Gerta Remšu on Kalevalan piirin kunnivokanšalaini, Karjalan tašavallan kulttuuriministerijön ta Karjalan neuvoštotašavallan korkeimman neuvoššon kunnivokirjojen omistaja šekä Venäjän kulttuuriministerijön Šuavutukšista kulttuurialalla -merkin omistaja. Gerta Nikolajevna aina oli “kulttuuririntaman” enšimmäisellä linjalla ta ammatillisešti ruato omie tehtävie.
Nytki, korkieh ikäh kaččomatta, Gerta Remšu staraiččou olla piirin kulttuuritapahtumien šeurašša. Omua pedagogie ta juohattajua muissetah laulukollektiivien entiset ošallistujat ta kollegat. Naisen merkkipäivänä hyö varmašti pistäyvytäh Gerta Nikolajevnan taloh, jotta juuvva čäijyö, onnitella päiväšankarie ta toivottua hänellä lujua tervehyttä.
Teksti ta kuva: Nadežda Vasiljeva, Kalevala, Oma Mua 7.2.2024
