Aloveh- da kunnanvalličuksien ehoitettuloin azettelendu loppih tossargen.
Kunnanvalličuksis vallitah evustajat kundien valdivostoloih, kuduat piätetäh kundien ruandas da talovuos. Alovehvaldivostot omas puoles vastatah sociali- da tervehyspalveluloin sego pellastusruadoloin organizuičendas. Aloveh- da kunnanvalličukset pietäh tulien kuun keskivälis.
Lähivälivägivaldah abuu kyzyjien miäry on kazvanuh äijälgi mennyzien vuozien aigua. Enzi- da turvukodiloin liiton mugah sen ozanottajien yhtistyksien vägivalduruavon palveluloih mulloi pyrgiihes jo enäm 12 700 (kahtutostutuhattu seičendysadua) hengie.
Kananjäiččien salmonellaebäilys viey kymmenien tuhanzien kanoin hävitändäh. Kananjäiččypakkuamo Dava Foods on vedänyh iäres markinoilpäi enäm puoldu miljonua kananjäiččiä. Salmonellaebäilys koskou piäl puoldu miljonua kananjäiččiä, kudamien jälgimäine käyttöpäivy on 6.3., 7.3. libo 17.3. (kuvves, seiččemes libo seiččemestostu kevätkuudu).
Suat alaigähizet puututtih ilmai lujii perustehii sijoitukseh koin ulgopuolele. Ylen hyvinvoindualovehile luajitus kyzelys ilmenöy, gu erähil alovehil alaigähizile ei ole tarittavannu hätken kestäjiä ozastohoiduo psihiatrizel ozastol, da nuoret sijoitetah lapsiensuojelendan yksikkölöih.
Suomen Yrittäjät -järjestö čakkuau pozitiivizen laihinregistran vaikutuksii.
Hoidajien mugah hyvinvoindualovehien siästöpainehet da niilöinke tulluh ebävarmus on jygei dielo. Vaigu harvu Tehyn ozanottajis uskou, gu sil täydyy vägie ruadua sociali- da tervehysalal penziessäh.
Kuundele liziä Yle Areenas: https://areena.yle.fi/podcastit/1-73056109
