Ammattiliittoloin keskusjärjestö SAK zavediu tulien ezmässargen uvvet poliittizet zabastoukat.
Net kestetäh kaksi nedälii da vaikutetah paiči muudu viendäh, tuondah da logistiekkah.
Hurualistoliiton paginanvedäi Li Andersson lähtöy nečis ruavospäi sygyzyl. Andersson jättäy paginanvedäjän ruavon tämän kavven loppevujes vuvvennu 2025 (kaksituhattu kaksikymmen viizi), konzu puoloveh pidäy tulien puolovehkerähmön. Nygöi Andersson saneli sežo sit, gu häi on menemäs ehoitetukse europarluamentanvalličuksih.
Suomen suuriman mečästysrikoskogonažuon ezitutkindu on valmistettu da se siirdyy viärityskačondah. Ebäiltyy on enäm 30 (kolmiekymmendy) da hyö ollah enimite pohjassavolazii miehii.
Mugasanotun aivodoupingan käyttämine on ližennyh päivänlaskumualois da sežo Suomesgi, nenga arvivoiččou päihtehliečetiijon professoru.
Suomelazis kuluttajis nelläsvuitil dengutilandeh on moine paha, ga kai se ei kestä eloksenmenoloin nouzendua. Vuitil suomelazis aiguhizis nivouse ei ole suojua tuhkurokkuo vastah.
Lapis Urho Kekkozen kanzallispuustos on puhkennuh vaččutaudiepidemii. Lapin pellastuslaitos on tässäh evakujiiruinnuh kolmetostu matkuniekkua.
Kuundele ližiä Yle Areenassa: https://areena.yle.fi/podcastit/1-68302383