Suomi algau varustua irdavumistu pehottumiinat kieldäjäs Ottawan sobimukses.
Dieloh näh tossargen saneli piäministru Petteri Orpo. Yhtelaigua zaveditah muavoimien uvvistamine. Pehottumiinu on moine räjähtyslaiteh, kudai puaksumbah räjähtähes ristikanzan koskendas.
Aloveh- da kunnanvalličuksien ennepäi-iänestys algavui kolmanpiän da se lopeh tuliel nedälil tossargen. Ulgomual ennepäi-iänestysaigu on vähästy lyhyömbi.
Kelirikkokauzi on algavumas Päivännouzu- da Keski-Suomen dorogoil. Keviän siä äijäl vaikuttau sih, mittumakse kelirikko jälgimäi roih.
Tieliikendehen šumu häiriččöy aijembua enämbiä linnalastu. Tämä tiijustettih THL:n kyzelys.
Oigevuskanslerale on työtty kaikkiedah kaheksa žualobua sih näh, gu halličus ei tahto eistiä edehpäi ehevytyshoidoloin kieldämisty. Parluamentan oigevusaziiniekan toimistoh on kirjuamon mugah tulluh yksi žualobu. Kanzalasaloiteh ehevytyshoidoloin kieldämizes sai piätteniččän parluamentan suuren tuven.
Finnairan lendo Ispuanispäi Suomeh pyhänpiän jätti ottamatah 80 matkusumčua da čamodanua. Finnairan mugah matkusumčat pidi jättiä, sendäh gu vastutuulen täh lendokoneheh pidi zapruavie tavanmugastu enäm poltoainehtu.
Kuundele liziä Yle Areenas: https://areena.yle.fi/podcastit/1-73056128
