Yle uudizile karjalakse rodih 10 vuottu. Yle Pohjas-Karjalan radivos algavunnuttu karjalankielisty uudiskačahtustu nygöi kuulet podkastoinnu Areenas.
Karjalankielizien uudizien luajindu on ližännyh kielen prestiižua sego äijälgi kehitännyh nygösty karjalan kieldy, nenga arvivoiččou allus algajen niilöi kiändänyh da lugenuh Päivännouzu-Suomen yliopiston livvinkarjalan opastai Natalia Giloeva libo karjalazilleh Hiloin Natoi.
Suomen suurin kaupalline TV-yhtivö MTV siirdyy norvegielazeh omistukseh. Norvegielaine Schibsted Media ostau MTV:n da Ruočin TV4:n nygözel omistajal teleyhtivö Telial nenga 600 miljonal eurol.
Ruavottomien miäry on pyzynyh suurennu. Ruavottomua ruavoneččijiä oli pakkaskuul enäm 320 000. Ruavottomusasteh pyzyy lähäl yheksiä prosentua.
Hiihtokeskuksien ruadotoras on varavuo talvilomien nedälil. Palvelualoin ammattiliitto PAM on piättänyh pidiä kaksipäiväzen zabastoukan, kudai algavuu tulien nedälin ezmässargen.
Jonot vahnoin hoivukodiloih ollah lyhetty Suomen erähil čuril. Ymbärisuutkahistu hoivusijua mennyt vuvven lopul vuotti läs 2 200 hengie.
Ylehizen eländytuven suajien miäry da menot kiännyttih alah mulloi.
Suojelupolicii on luadinuh ruadajile rekordumiärän turvalližussellitysty. Sellitykset ollah roittu ylehizikse sen jälles, konzu Ven’a hyökkäi Ukrainah.
Päivännouzu-Suomen yliopistos luajittavas väitöstutkimukses sellitetäh syylöi pravoslaunoin kirikön ozanottajien miärän pienenemizele.
Kuundele liziä Yle Areenas: https://areena.yle.fi/podcastit/1-73056107
