Uutiset

Sampsan kaššali täytettih suarnal karjalazien luaduh

Kirjoittanut: Toimitus
Julkaistu: 22.3.2023
Asiasanat: musiikki

Mennyt ezmäsarren, 20. kevätkuudu, Petroskoin Rahvahan taijon da kul’tuurualguh panoloin keskukses piettih ozutelmu “Mittuine on tuohi, se i robeh” Oma Pajo -horan todevutettavan Sampsan kaššali – projektan mugah.


Tiettäväine, ku nimidä et rua yksinäh, täs pivos oldih hyvät abuniekat horal. Mulloi horah kuulujat kirjutettih projektan da suadih pienehkön petroskoilazien lapsien joukon “Oman Pajon” tyveh. Lapset ruvettih käymäh horan pajo- da muuzikkuharjaituksih.

“Sampsan kaššali” – moine on oraskuul vuvvennu 2022 alletun projektan nimi, sih on suadu varua Kul’tuurizien aloittehien prezidentan fondaspäi. “Oman Pajon” horaniekat ollah hyväs mieles, ku nygöi voibi opastua omii neroloi da maltoloi nuorižole, roitah uvvet orahat horas!

Ga kaikkii kylvölöi pidäy hoidua, vuvven aloh omapajolazet opastettih lapsii karjalazeh kul’tuurah, lapsethäi ozutettih omii neroloi ozutelmas “Mittuine on tuohi, se i robeh”.

Šlöpöin-čidžoi da Marjan-čidžoi pakitah, ku Tapio andas käbylöi mečän kylvämizeh niškoi. Kuva: Margarita Kemppainen.

Sinäpiän omapajolazet da sampsalazet täytettih Sampsan kaššalii kylläl! Kummallizen suarnan käzikirjutuksen mugah kaksi tolkuttomua, ga ilokastu suarnumečän eläijiä – Šlöpöinčidžoi da Marjan-čidžoi – löyttih vahnan tuohizen Sampsan kaššalin vihman jälles, ga pahas mieles, se oli tyhjy… Ammui Väinämöine kyzyi Sampsua kylviä muadu, ku tyhjäl mual kazvoi meččy, ga siemenet toinah loppevuttih…

“Midäbo ruadua, kuibo nygöi rubieu kazvamah meččy, ken rubieu kylvämäh sidä da mil?”, pahelzuttih čidžoit. Ga meijän lapset – Sampsa Pellervoizen jälgeläzet – tuldih abuh heile! Kučuttih Tapio-ižändiä čidžoloinke yhtes, pakittih lubua kerätä käbylöi. Ga Tapio ei andanuh lubua kerras, kuni lapset da čidžoit ei ruvettu sanomah suarnua, arbailemah arbaituksii da pajattamah pajuo. Sampsalazet oldih tovellizinnu ystävinny, kai luajittih hyvin! Pädöy kaččuo, kui lapset pajatettih da paistih rohkieh karjalakse. Ku luadiehäi midätahto tärgiedy da suurdu, ezimerkikse, opastuo pagizemah muamankielel välläl suul da tiediä enämbän omah karjalazeh kultuurah nähte, pidäy algua vähäs!

Konsertale tuli äijy rahvastu, kučuttih erikseh horan veteruanoi. Pivon lopus projektan pienet abuniekat on suadu lahjakse diplomat, kuduat vältämättäh pätäh heij än tuliekse aigua, merkikirjuttimen da magiedu.

Ga horan projektu ei loppevunnuh, se jatkuu oraskuussah. Tänä keviän omapajolazet oman lapsijoukon kel reknaillah ajelta da ozuttua Mittuine on tuohi, se i robeh -suarnua Karjalas vie äijän kerdua, oraskuus ruvetah luadimah projektan ruavon yhtehvedoloi.

Teksti: Natalja Gromova, Oma Mua 22.3.2023

Lue nämäkin:

Nedälin 20 Yle Uudizet karjalakse Yle Areenassa

Nedälin 20 Yle Uudizet karjalakse Yle Areenassa

Suomen halličus ezittäy zakonanmuutoksii, kudamien vuoh rajavardivolaitoksen alahizii rezervuniekkoi voidas poikkevustilandehis käskie valvonduruadoloih rajale. Ezityksen mugah Rajavardivolaitoksen alahizii rezervuniekkoi sežo voidas työndiä kerdavusharjaituksih...

Mikä on Uutisčuppu?

Uutisčuppu – Uudisčuppu on Karjalan Sivistysseuran uusi ajankohtaiskanava. Julkaisemme tällä sivustolla kiinnostavia uutisia ja tietoa tulevista tapahtumista.

Tilaa uutisviesti

Tilaa sähköpostiisi ilmoitukset uusista artikkeleista.