Arhippa Perttusen šiätijön ta karjalaisen kulttuurin Viena-šeuran Kotimuan voima -projekti piäsi Karjalan tašavallan piämiehen granttišiätijön kilpailun voittajakši. Grantin summa on yli 1 700 000 rupl’ua.
Arhippa Perttusen šiätijön ta Viena-šeuran ošallistujat voitettih Karjalan tašavallan piämiehen 1 753 790 rupl’an grantti Kotimuan voima-projektin toteuttamiseh.
Kilpailuh ošallistu 142 projektie. Voittajiksi piäsi 65 kanšalaisjärještyö, kumpaset toimitah kanšalaisyhteiskunnan instituuttien kehityšalalla.
– Šuatuilla rahavaroilla šiätijö šuunnittelou oštua laittehie ta materialija käsityö- ta keittotaitomuasteri-oppija varoin, ašettua kantelen muistopačaš Vuokkiniemeh, oštua jouhikkoja ta viettyä Vienan Karjalan vanhojen runokylien pruasniekkoja, kerto Kotimuan voima-projektin ohjuaja Julija Filippova.
Niise aktivistit meinatah käyttyä granttie šuuren Viena Camp -etnotilaisuon viettämistä varoin. Šiih kučutah ošallistujie Karjalan eri piirilöistä. Nellän päivän aikana hyö ruvetah opaštumah karjalaisie kanšallisie käsitöitä, tutuštumah vienankarjalaisien perintehih, a viijentenä päivänä hyö ošallissutah pruasniekan järještämiseh Pirttilahen Taipalehuuttorilla.
– Meilä Viena Camp on uuši šuunta. Luovua tilua vietetäh Vuokkiniemen kyläššä. Yritämmä täyttyä šitä etnisillä elementtilöillä, jotta ošallistujat šyväšti čukelluttais meijän karjalaiseh kulttuurih, šano Julija Filippova.
Loppurahavaroilla šiätijön ošallistujat ommellah keškiaikasie karjalaisie pukuja ta autetah Orvokkikuklateatterie.
Kilpailu mäni Presidentin granttišiätijön yhteisrahotukšella. Kilpailun varojen kokonaissumma oli šata miljonie rupl’ua.
Teksti: Aleksandra Lesonen, Oma Mua 23.11.2022
Kuva: Arhippa Perttusen šiätijön VK-šivu
