Mennyt nedälin nellänpiän 3. tuhukuudu Zoomas piettih professoran Anneli Sarhimaan 60-vuozipäivy. Karjalan Sivistysseura kučui Annelin roindupäiviä pruaznuimah hänen omahizii, ystävii da ruadodovariššoi. Gost’ua oli tulluh Suomes, Germuanies, Hollandies, Austries sego Ven’an Karjalaspäi. Pruazniekku rodih lämminhengine da vessel. Sih kuului mustelendua, šuutkua, šulkuzii passiboloi da ”Šulkkuni sanaine”.
”Šulkkuni sanaine” on uvven kniigan nimi, kudai roih eri murdehien kahtes sanamuvvos, mi juohattau meile: karjalan kielen murdehet eletäh yhtes da sovus. Kniigu on omistettu le da se rodih hänelleh parahakse lahjakse roindupiän. Pruazniekkukniigan ollah toimitettu Riho Grünthal, Eeva-Kaisa Linna, Pirkko Nuolijärvi da Helka Riionheimo. Kniigah kuuluu 24 kirjutustu kaikkiedah 26 kirjuttajalpäi. Täs kirjutuskogomukses kačellah vähembistökielii da enne kaikkie Suomes paistavua karjalan kieldy. Kirjutuksis sanellah kielen elvytändäs, karjalan kielen ylirajažuos, sen bohatas sanastos sego karjalazien hengilökohtazis kogemuksis, kuduat koskietah karjalan kieldy da karjalažuttu. Kirjutukset ollah vuitti sidä paginua, kudamah Anneli Sarhimaa on viritännyh kaikkii omassah tiij ollizes da yhteiskunnallizes ruandas: monikieližys, vähembistökielien azeman puolistamine, karjalan kielen elvytändy da kehitändy sego karjalazien oma iäni.
