Ligakuun 14. päivänny Karjalan Kanzalline teatru pidi omal laval Genrik Ibsenan ozutelman pohjal luajitun Nora-spektaklin enziillan.
Uvven spektaklin luadimine ainos on suurennu teatrutapahtumannu, sidä nikonzu ei varusteta petties. Muga oligi Noraozutelman kel, se vuotti omua aigua, ohjuajua da ozuttelijoi läs 80 vuvven aigua. Tädä ozutelmua ozutettih teatras vaiku kerran vuvvennu 1944, sen ohjuajannu oli kuulužu Nikolai Demidov, sil aigua häi oli Suomelazen druamuteatran taidojohtajannu. Piäroulis spektaklis oli Irja Viitanen. Voinah kaččomattah spektakli rodih merkittäväkse tapahtumakse ei vaiku teatras. Sidä kaččomah Belomorskah tuli kogonaine kriitiekkujoukko. Jällespäi sidä ozutettih Moskovan laval, Irja Viitastu verdailtih tundiettuh Vera Komissarževskoih.
Nora-spektaklin piäroulilois ollah Karjalan arvostetut ozuttelijat Julija Kuikka da Andrei Gorškov
Uvven Nora-spektaklin piäroulilois ollah Karjalan arvostetut ozuttelijat Julija Kuikka da Andrei Gorškov. Tämän spektaklin enzi-ildu kuului Kanzallizen teatran 90-vuozipäivypruazniekkah.
Teksti: Tatjana Torvinen, Oma Mua 19.10.2022
