Mediaopaštevoš Karjalan tašavallan perintehelliseštä puvušta “Pihan etiketti” on Presidentin granttišiätijön voittanut projekti. Projektin ryhmä on alkan valmistautuo kanšanpuvun käytön šiännöistä kertojien oppimaterialien luatimiseh.
Karjalašša on kanšallisie luomisryhmie, käsityömuasterija šekä oman kulttuurin harraštajie, kumpaset tarvitah tietoja perintehellisistä vuatteista ta niijen käytöštä.
– Projektin alkuhpanijana ta johtajana on Karjalan tašavallan kanšallisien kulttuurien keškukšen spesialisti, Karjala-yhtyvehen ošallistuja Ol’ga Husu. Hiän kučču projektih oikeita ammattimiehie. Projektin ryhmä luatiu karjalaisie pukuja, valiččou istorijallisie valokuva- ta videomaterialija šekä kuvuau videoita, ilmotetah Karjalan tašavallan kulttuuriministerijön spesialistit VK-šivulla.
Karjalaisien piähinehien lajiloista ta niijen käytöštä kerrotah Karjalan tašavallan karjalaisien, vepšäläisien ta šuomelaisien kieliresurssikeškukšen spesialisti Natalja Denisova ta pukujen asientuntija Jekaterina Logvinenko. Šamah aikah Natalja ta Jekaterina iče valmissetah vienankarjalaista naisien ta lapšien pukuo.
Miehien pukuo ompelou Karjalan kanšanmuasteri, Kižin musejon perintehellisien käsityöammattien ošašton johtaja Marina Guseva.
Karjalaisien naisien koriššukših tuttavuššuttau Milii Balakirevilla nimitetyn Petroskoin lapšien taitokoulun opaštaja, kanšanpuvun muasteri Polina Vorobjova.
Tämän čopakan ruavon tulokšie kohta esitetäh Kanšallisien kulttuurien keškukšen Youtube-kanavalla www.youtube.com/c/ЦентрНародногоТворчестваРеспубликиКарелия ta VK-šivulla:
vk.com/etnodomrk
Teksti: Oma Mua, 22.9.2021