Karjalan tietokeškukšen tietomiehen ta folklorin tutkijan Marija Kundozerovan valmistama Kiestinkin šeuvun kertomušperinnehtä -kirja on painettu.
Karjalan tašavallan Louhen piirin šekä Murmanskin alovehen Kantalahen piirin kertomušperinnehtä on esitetty uuvvešša kirjašša. Šen valmistajana on Karjalan tietokeškukšen tietomieš, folklorin tutkija Marija Kundozerova.
‒ Kirja on Nina Lavosen kokomukšen “Kiestinkin kanšanlauluja” jatkona. Vuotena 2013 mie henkilökohtasešti tutuššuin Nina Aleksandrovnan kera ta hiän šano, kuin äijän materialie on instituutissa ta jotta pitäy valmistua šitä julkaisomisekši, šelitti kirjan luatija Marija Kundozerova.
Materialien valmissuš kirjua varoin alko vuotena 2019, vuosi takaperin še oli n’euvottu julkaisomisekši ta nyt kirja on valmis. Kokomukšešta voipi lukie Karjalan tašavallan Louhen piirin šekä Murmanskin alovehen Kantalahen piirin XIX–XXI vuosišatojen starinoja, legendoja, mifologisie ta istorijallisie tarinoja, ihmehšuarnoja karjalakši ta niijen venäjännökšie. Šamoin kirjašša on liiteh, kumpasešša on kerrottu julkaistujen starinojen kertojista, folklorin keryäjistä ta on esitetty Kiestinkin šeuvun kylien kartta. Kirjan painošmiärä on 300 kappalehta. Ne levitetäh Karjalan kirjaštoih, kulttuurikeškukših, enšikši Karjalan pohjosešša.
Šuunnitelmissa on kirjan esittely. Oraškuun 29. päivänä še pietäh Koštamukšešša Viena-šeurašša. Marija kertou mitein kirja valmissettih ta lukou koštamukšelaisilla luvennon “Runonlaulu pruasniekka- ta arkipäivinä”. Šen jälkeh esittelyjä pietäh Kiestinkissä 31. oraškuuta, Piäjärveššä 6. kešäkuuta ta Petroskoissa.
Kirjan valmistajana on Marija Kundozerova, tietotoimittajana on Aleksandr Petrov, arvoštelijina ollah Aleksei Konkka ta Nikita Petrov, kuvittajana on taiteilija Dmitrii Dmitrijev, kiäntäjinä – Ol’ga Gorškova, Nina Lavonen, Marija Kundozerova, Natalja Vorobei ta Andrei Osipov.
Kirja on painettu Arhippa Perttusen šiätijön toteuttaman Kotimuan voima -projektin rajoissa.
Teksti ta kuva: Uljana Tikkanen, Oma Mua 24.5.2023
