Kuhmo on valittu kulttuuripiäkaupunkiksi

Šuomen Kuhmo-kaupunki valittih šuomelaisugrilaisekši kulttuuripiäkaupunkiksi. Tämän statussin kaupunki šuau vuuvvekši 2023.

Kulttuuripiäkaupunkin statussi merkiččöy, jotta Kuhmošša tulou enemmän kulttuurimatkailun kehittämisen mahollisukšie. Šamoin kaupunki tahtou kannattua kulttuuriperinnön ta šuomelais-ugrilaisien kielien šäilyttämistä ta elvyttämistä koko šuomelais-ugrilaisešša muailmašša.

Kulttuurivuuvvekši valmissetah ohjelma, kumpasen piätavoittehena on tajuomisen noššattamini šuomelais-ugrilaisista kielistä ta kulttuuriloista. Niise ohjelma kannattau alkuperäiskanšojen uhanalasien kielien elvyttämistä ta niijen rikkahien musiikkiperintehien šäilyttämistä. Šemmosie tilaisukšie piäkaupunkiohjelmašša on yli šata. Tapahtumien piäjärjestäjänä on Runolaulu-Akatemija yheššä Juminkeko-šiätijön ta Kuhmon kaupunkin kera. Musiikkipruasniekka “Sommelo” on juhlavuuvven piätapahtuma.

– Vuuvven teema šopiu meijän kaupunkilla erinomasešti, šentäh kun monet elementit ollah jo valmehet. Vuotamma ta toivomma, jotta šuamma lisyä matkailutuloja ta šamalla kulttuuritoimittajat voijah vahvistuo, šano Kuhmon kaupunkinjohtaja Tytti Määttä.

– Kuhmo voipi äijän mitä tarita koko šuomelais-ugrilaisella muailmalla. Esimerkiksi, Juminkeko yli 30 vuotta toimiu karjalaisen kulttuurin elvyttämisekši ta perintehien šäilyttämisekši Šuomešša ta Karjalašša. Niise Runolaulu-Akatemija ta toiset kulttuurijärještäjät voijah lisätä kontaktija ta yhteyttä šuomelais-ugrilaiseh muailmah. Tämä merkiččöy tukie kielien ta kulttuuriperintehien šäilyttämiseh tutkimukšien ta taitehellisien tapahtumien šekä aktiivisen vuorovaikutukšen avulla, korošti Pekka Huttu-Hiltunen.

Vuuvven ohjelman toisina šuurina tapahtumina ollah Kuhmon Talvi -kielikonferenšši ta Ison Karhun Kantapäillä -tapahtuma, kumpani on omissettu kontien merkitykšellä šuomelais-ugrilaisien kanšojen mifologijašša.

Niise muailmantunnettu “Kuhmon Kamarimusiikki” ošallistuu ohjelmah.

Šuomelais-ugrilaisen kulttuuripiäkaupunkin statussie ruvettih myöntämäh eri kaupunkiloilla ta kylillä vuuvvešta 2013 alkuan. Täkši vuuvvekši še on myönnetty Venäjän udmurttilaisella Baiterekin kylällä.

Teksti: Oma Mua 2.2.2022
Foto: Juminkeko-siätijö