Karjalašša alko alovehien välini karjalan- ta vepšänkielisien nauhotukšien Kuulen omua pakinua -marafoni.
Kuulen omua pakinua -marafonin aikana Karjalan tietokeškukšen kielen, kirjallisuon ta istorijan instituuttih voipi työntyä karjalanta vepšänkielisie nauhotukšie.
Marafonin ošallistujan pitäy nauhottua ta kuvata videoh ihmistä, kumpani muamonkielellä kertou iččieštä, omahisista, perehtavoista, kotimuašta, istorijašta, uškomukšista, legendoista, mukavista tapahukšista ta toisista teemoista.
– Marafonin parahat nauhotukšet myö panemma VepKar-kielikorpussih. Tahomma, jotta šielä olis enemmän nauhotukšie Karjalan tašavallašta, Murmanskin, Leningradin, Vologdan, Tverin alovehilta šekä toisista paikoista, missä eletäh karjalaiset ta vepšäläiset, šano marafonin järještäjä, Karjalan tietokeškukšen kielen, kirjallisuon ta istorijan instituutin tietomieš Aleksandra Rodionova.
Marafoni on omissettu Karjalan kielentutkijilla Grigorii Makarovilla ta Matvei Hämäläisella.
Instituutin lisäkši marafonin järještäjinä ollah Petroskoin valtijonyliopisto ta Karjalaisien IX kerähmön valtuutettujen neuvošto.
Lisyä tietuo marafonista voipi löytyä tapahtuman VK-ryhmäštä vk.com/speechvepkar. (venäjäksi)
Teksti ta kuva: Uljana Tikkanen, 1.2.2023 Oma Mua
