Pitkäh matkah lähtijes ainos ota hyväd dovarišad. Kuva: Sergei Minvalejevan Arhiivaspiäi
D’ogahižel ristikanzal on olemas oma perimuz: ken paštau štipanikoid pyhinpäivin, ken kävyy kylyh suobatoin, ken valmištau vastoid Viändöin aigal. A minä ylen äijäl armastan kävydä meččäh talvel.
Tuhukuun 16. päiväl vuodel 2008 myö dovarišoineh kävimme ezmäižeh talvpohodah. Muštan, kui päiväine paštoi, kui se lämbitti meid. Täl čomal päiväl myö tulimme d’algai Hiidenniemele. Ištuimme niemen n’okal, termosas oli hiilav čaju. Myö d’oimme čajud, ihastuimme čomad luondod, kačoimme ylähälpiäi Äniždärvele da meiden Petrouskoi-lidnale, kui se nägyi vastažel därven randal. Olimme ihastuksiš sih, senperad piätimme kävydä pohodah d’oga talvel!
Tulijal tälvel meid oli d’o kaheksa miest, kävymme Hiidenniemel Tiedpäivän, 8. tuhukuud, i siloi myö piätimme nimittädä meiden pohodad Tiedpävän kunnivokse. Vuodes vuodessuai meiden d’ouk kazvoi, vuodel 2018 pohodah keradui d’o 18 miest! Ken tuli lapsenke, ken dovarišanke, a kengi koiranke! Mečäs tilad löydyy kaikile!
Myö poltimme roivod, paštoimme kalbasad tulel, viändžimme kui lapsed! Pohodan aigal meil oli ainoz vessel’!
Olen hyväs mieles sit, gu meiden perimuz, kudai on alganu seiččemetošte vuotte tagaperin, d’atkuu nygyygi.
Täl vuodel tuhukuun 16. päiväl myö uutašti keraduimme pohodah Hiidenniemele, gu yhtes pruaznuita Tiedpäiväd mečäs, gu yhtes polttada roivod, yhtes syödä tulel paštetud kalbasad da d’uoda roivol keitetyd hiilavad čajud, yhtes viätä da vesselduda! Olen hyväs mieles, gu moižed pidod yhtištetäh meid i lujetah meiden siebrutte!
Paušin Šan’uu, Oma Mua 12.3.2025
