Pohjas-Savon paikalline suudo andoi ezmässargen nakazuaniet Suomen suurimas peittomečästysdielonkačondas
Suudo pani ehtollistu vangičusnakazuaniedu, štruaffuu sego mečästyskielduo. Viäritettylöinny oli 31 hengie, kudamis 26 sai nakazuanien. Rikokset tapahtuttih enimite Lapinlahtel vuozinnu 2019–2023.
Vappupiän da sidä vaste rahvas kerävyttih pruaznuimah linnoin keskuččoih.
Halličus planiiruiččou lujenduksii lapsien kodihoijon tuven ehtoloih. Tugie suajah moizet vahnembat, kuduat ollah eletty muas kolme vuottu. Kahten kul’tuuran perehien eduu ajajan Familia-yhtistyksen mugah pluanu eriarvoistau perehii.
Kelan piäjohtajakse on vallittu HUSan diagnostiekkujohtai Lasse Lehtonen.
Opastujien järjestöt čakattih duumavuo maksollizis korgeiškolatutkindolois. Suomen yliopastujankundien liiton da Suomen opastujankundien liiton mieles halličuksen piätökset heikendetäh opastuksellistu taza-arvuo.
Vasteroinnuzien eloksenaijanvuotandat ollah nostu Suomes ylen korgiele. Edukyndeh duumaittu eloksenaijanvuotandu oli mulloi tyttölöil 84,8 da brihaččuloil 79,6 vuottu.
Kuundele liziä Yle Areenas: https://areena.yle.fi/podcastit/1-73056302
