Tenterfield-terjieri on uuši koiranrotu Šuomešša. Kennelliiton tietojen mukah Šuomešša on čotalla vain 22 tenterfield-terjierie. Kennelliiton Harri Lehkonen einuštau rovun presidentillistä hyväššäluvušša pientyä.
Tašavallan presidentti Sauli Niinistön pereh on šuanun uuvven jäšenen koiranpennušta. Uutini oli ensin Iltaleheššä. Presidentin puoliso Jenni Haukio kerto asiešta Facebookissa ta Twitterissa.
– Miän pereheh on liittyn uuši jäšen, tenterfield-terjierin pentu – Osku, Haukio kirjutti.
Osku-nimen šuanut koiranpentu on rovultah tenterfield-terjieri. Tenterfield-terjieri on australialaini koirarotu, kumpaista Kennelliiton internettišivuloilla kuvual’l’ah väköväkši, aktiivisekši, poikkoiksi, monipuolisekši ta mukavankašvosekši ruatokoirakši.
Luonnoltah rotu on ičeštäh varma, opaštuvaini ta isännilläh ušollini. Tenterfield-terjieri on kašvoltah pieni koira, kun še on alla 30 sentin korkevuini.
Presidenttiparikunnan iellini koira, boston-terjieri Lennu nousi rahvahan mielikiksi ta kaikki rahvahienväliseh mainivohki. Lennu kuoli aivolisäkkehen kašvaimeh oraškuušša.
Šuomešša vain 22 yksilyö, presidentillini näkyvyš lisyäy čestie
Kennelliiton hallitukšen pakinanvetäjä Harri Lehkonen šanelou, jotta tenterfield-terjieri on aika uuši koirarotu Šuomešša. Täh palah Šuomešša on rekistriiruitu vain 22 tenterfield-terjierie.
Muuvval’ta ulkomailta tuotuja ta Kennelliittoh čotalla pantuja tenterfield-terjierijä on toissa ta männä vuuvven tietojen mukah yhteheš 9. Lisäkši tänä vuotena tämän koirarotuh kuulujua pennikkyä on Šuomešša šyntyn ta rekistriiruitu 13.
– Mistä lienöy presidenttipari on kekšin juuri tämän rovun, Lehkonen smiettiy.
Lehkonen tietäy terjierit hyvin, šentäh kun hiän on naiseh kera kašvattan jo 50 vuotta repoterjierijä. Hiän on käynyn Australijah šuaten ta ruatan šielä ulkomuotosutjana koirien näyttelykšissä, kumpasissa oli ni tenterfield-terjierijä keralla.
Lehkonen uškou, jotta lähivuosina Šuomešša rotu tulou ylehisemmäkši presidentillisen statussan tähen.
– Pennun kyšyjie tulou ihan oočerih šuaten. Kyllä tämä hyvyälukuo tietäy, šentäh niitä on hyväsešti verrattuna monih muih uuših rotuloih, Lehkonen muhittelou hyvilläh.
Šuomešša tenterfield-terjierijä on viijellä kašvattajalla, kertou presidentin pennun kašvattaja Kirsi Hautakangas. Täh palah penikkyä on šyntyn kolmešša koirienkašvatuštarhašša. Koirat on tuotu Šuomeh Australijašta ta Ruočista.
Vaikka kyšyntyä olis, tenterfield-terjierien miärä ei ruttoh kašva Šuomešša, arvelou Hautakangas. Kaikki tiijošša olijat pennut on varattu ta Australijašta on ainaki nyt vaikie šuaha tuuvva koirie Šuomeh.
Tenterfield-terjieri tiijetäh tovarissakoirana ta muatilojen hiirentappajana
Kennelliiton hallitukšen pakinanvetäjä Harri Lehkonen kertou, jotta tenterfield-terjieri tunnetah Australijašša šeurallisena muatilojen rottakoirana, toisin šanuon “hiirentappajana”, kumpani ajau hiiret, rotat ta muut pienet elukat loitoš – šamah tapah kuin jackrussel-terjieri Enklannissa.
– Ulkonävöltäh tenterfield-terjieri muissuttau karlikkapinčerie, kumpani on šakšalaini šeurakoira. Tenterfield-terjierin luonto on kalkaš, eläväini ta iloni muatilan tovarissakoira, elikkä oikein mukava koira, Lehkonen tolkuttau.
Hiän pitäy ušottavana, jotta tämä rotu on ylen terveh, šentäh kun tenterfield-terjieri on kyläläisrotuo, a muatiloilla ei tavan mukah läsijät yksilöt mäneššy.
Erinmoisie terjierijä on muajilmašša ta Šuomešša äijälti, ka juuri tämä terjierirotu on harvinaini.
– Šuomešša rotu on harvinaini, ka ei ni Australijašša še ole kovuan ylehini.
Rahvahienvälini koirienkašvatušliitto on pannun čotalla enämmän 400 koirarotuo muajilmašša, kumpasista Šuomešša on rekistriiruituna läššä 330, Kennelliiton Lehkonen kertou. Niin jotta Šuomi tiijetäh šiitä, jotta tiältä löytyy melkein kaikkie muajilman koirarotuja monipuolisešti.
Kiäntän vienankarjalakši: Olga Karlova
Lähteh: https://yle.fi/uutiset/3-12077245
Kuva: Pixabay
