Piäkuva: Lapset suadih mustokse Oma Mua -lehtes hyvittelykortin karjalan kielel. Kuva: Ol’ga Smotrova/Oma Mua
Oma Mua -lehti täyttäy tänä vuon 35 vuottu. Merkipäivän kunnivokse on valmistettu pidoloin programmu. Sen mugah lehten toimittajat jo käydih Vieljärven školah.
Vuvvennu 1990 perustettu Oma Mua -lehti täyttäy tänä vuon 35 vuottu. Merkipäivän kunnivokse on luajittu programmu, kuduan mugah lehten toimittajat varustettih eri pivot. Enzimäine niilöis oli matku Vieljärven kyläh.
Sulakuun 18. päivänny Oman Muan toimittajat piettih urokat Vieljärven keskiškolan algukluasoin da kuvvenden kluasan opastujile.
Ezmäi toimittajat saneltih opastujile, mittumii julgavoloi piäzöy ilmah Periodika-julgua mos. Sit toimittajat tarkastettih, tietähgo opastujat Kalevala-eeppisty runoelmua. Margarita Kemppainen opasti lapsii soittamah kandelehel.
– Oli hyviä mieldy kuulta, kui algukluasoin opastujat vastattih meijän kyzymyksih. Hyö tietäh, mis Kalevalan mugah oli luajittu enzimäine kandeleh, kerras vastattih, ku haugii runoelmas verratah merikoirah. Alguškolan lapset dai kuvvenden kluasan opastujat mielihyväl kosketeltih meijän tuovun Vieljärves suavun da kuivatun havvinpiän terävii hambahii, sanou Margarita.
Algukluasoin opastujile Margarita Kemppainen saneli perindöllizis karjalazis ruutis, lapset pandih piäle karjalazii sobii, ihan nengomii, kudamii rahvas piettih XII vuozisual.
Kuvvenden kluasan lapsile Ol’ga Smotrova kehoitti vesselii kieliharjaituksii, Valentina Mironova sellitti, mindäh on tärgei maltua omua muamankieldy. Sit toimittajat vähäzel saneltih, kui karjalazet varustettihes Äijäksepäiviä da midä ruattih kallehennu pruazniekkupäivänny.
Midä pidäy ruadua, ku čakat ei n’okittas, mindäh sanotah, ku Äijänpiän päiväine pläššiy, da mittumii piirualoi ei pastettu Karjalazet Äijäksepäiviä – nämmis da toizis perindölöis lapset kuultih enzikerdua.
Kuvvenden kluasan lapset sežo oppittih soittua kandelehel, heijän orkestru kuului opastuspertie loitombagi.
Ol’ga Smotrova, Oma Mua 23.4.2025
¨¨¨¨¨¨¨¨¨¨¨¨¨¨¨¨¨¨¨¨¨¨¨¨¨¨¨¨¨¨
Mi sana ei päi joukkoh?
Kevätkuu
Kezäkuu
Sulakuu
Oraskuu
¨¨¨¨¨¨¨¨¨¨¨¨¨¨
Talvikuu
Kevätkuu
Ligakuu
Kezäkuu
¨¨¨¨¨¨¨¨¨¨¨¨¨¨
Mandžoi
Must’oi
Buolu
Muur’oi
¨¨¨¨¨¨¨¨¨¨¨¨¨¨
Kartohku
Juablokku
Nagris
Ogurču
¨¨¨¨¨¨¨¨¨¨¨¨¨¨
Korbimeččy
Pedäjikkö
Niitty
Kadajikko
¨¨¨¨¨¨¨¨¨¨¨¨¨¨
Nurmikko
Aho
Koivikko
Niitty
Kirjuta joukkoh pädii sana
Kargei
Muigei
Magei
¨¨¨¨¨¨¨¨¨¨¨¨¨¨
Vihmaksine
Lämmin
Viluine
¨¨¨¨¨¨¨¨¨¨¨¨¨¨
Sinine
Kalakas
Čoma
¨¨¨¨¨¨¨¨¨¨¨¨¨¨
Niittiä
Kuivata
Haravoija
¨¨¨¨¨¨¨¨¨¨¨¨¨¨
Sarai
Kyly
Tahnut
¨¨¨¨¨¨¨¨¨¨¨¨¨¨
Päiväine
Pilvi
Tiähti
Mi voi olla mostu värii?
Maksankarvaine –
Muzavanruskei –
Keldaine –
Valpahanvihandu –
Muzavanvihandu –
Sinine –
Fioletovoi –
Harmai –
Mustu-valgei –
Valmisti Ol’ga Smotrova, Oma Mua 23.4.2025
