Piäkuva: Vanhan Uuvven vuuvven vaštahotto “Izumrudikaupunkissa ”. Tatjana Šelina
Perintehen mukah pakkaiskuun 13. ta 14. päivien välisenä yönä koštamukšelaiset juhlittih Vanhua Uutta vuotta yheššä Kipatri-turistiklubin kera leirintäalovehella šuomelaisen stadionin lähellä.
Pakkaseh kaččomatta “Izumrudikaupunkih” lämpimän ropivon lähellä keräyty ušeita aikuhisie ta lapšie. Klubin ainani johtaja Sergei Volkov onnitteli keräytynyitä Vanhalla Uuvvella vuuvvella, a šiitä meččyä kirkašti šuuri juhlatulituš. Še oli klubin lahja kaupunkilaisilla.
– Kipatri-turistiklubi peruššettih 1980 vuotena. Joka vuosi myö loppumatta vietämmä eri joukkotilaisukšie. Alottimma turistikerähmöštä, šiitä järještimä vesirallin 1990 vuotena, a myöhemmin rupesima juhlimah Vanhua Uutta vuotta, šaneli Kipatri-turistiklubin ohjuaja Sergei Volkov.
Enšin klubilaiset vietettih juhlua pieneššä turistijoukošša – hiihettih, mäntih meččäh yöpymäh. Ka jo 15 vuotta hyö pietäh šitä julkisešti Koštamukšen valitušša ošašša, jotta kaikki halukkahat voitais liittyö pruasniekkah.
– Ennein keräytymä nurmikolla hiihtomajan lähellä, a nyt jo toista vuotta peräkkäh piemmä tiälä, “Izumrudikaupunkissa”. Meilä on kašvušuuntie, on mih piäššä. Tapahtuman popularisuš kašvau. Ihmisillä ei riitä pruasniekan tunnehta ta hyö tullah meilä. Meijän ideja on kerätä ihmisie yhteh, jotta hyö tutuššuttais uuših ihmisih, oltais alotuš-kykysinä, alotettais omua toimintua. Jotta ois mukava valmissamma tilua, ropivuo, juhlatulitušta, glögie. 2024 on Vihrien Drakonin vuosi. Kiinalaisen kalenterin mukah še alkau 10. tuiskukuuta. Vihrie Drakoni on puitto lippu meijän päijen piällä. Toivotamma Koštamukšen eläjillä ta Venäjän kaikilla kanšalaisilla äijän pienie voittoja tulluona vuotena! Šilloin tapahtuu sinergini effekti, kuin myö, teknikot, šanomma. Kaikki ne pienet voitot tuuvvah meijät šuureh voittoh, kerto klubin ohjuaja.
Toivomma, jotta yli 40 vuotta takaperin šyntynyöt perintehet iellähki ruvetah vaikuttamah koštamukšelaisih ta kaupunkin vierahih.
