Armahat yštävät!

Kalenterin viimeni lehti on kisottu ta šeisoja oven takuana pakkaiskuu vuottau onnitteluja. Myö onnittelemma teitä tulijalla Uuvvella Vuuvvella! Anna kaikki teijän toivot toteuvutah! Olkah vuosi 2022 onnellini ta tuokah še iluo teijän taloih! Toivotamma teilä rakkahutta ta tervehyttä, lykkyö kaikissa aseissa! Eläkkäh karjalan kieli meilä ilokši ta mierolla tiijokši!

Karjalaisen kulttuurin Viena-šeura

Elettähes miero kaikes rauhas!

Vieljärvel eläi Ivanova Marija Iljinična vuottau 13. päiviä kevätkuudu ku pyhiä. Silloi häi täyttäy yheksäkymmen kaksi
vuottu. Lähäzeh kyläzeh Kirvesjärveh rodivunnuh da kazvanuh naine on kaikis vahnin täkse päiviä Vieljärven eläi.

Marija Iljinična eläy yksin, abuh hänelleh kävyy hoidai. Tuou laukaspäi leibiä, kandau viet da hallot, suomiu pihat. Suurembat dielot hoidau Galina-tyttäreh, kudai ajelou Petroskoilpäi joga nedälin lopus. Galina pidäy kai suurembat pezot, taluu muamadah kaz’onnoih kylyh kerran kahtes nedälis, hommuau rohtoloi.

Marija Iljinišna on vessel da pagizii ristikanzu. Hänel on erinomaine musto da lougine ajattelendutaba. Omua elaigua häi eipie kebjienny, ga nygöi, sanou, kylläl on kaikkie midä vai vahnazel pidäy. Naine eläy vahnas puuhizes barakkukois, koin sydämes ei ole käymälkohtua, eigo vezi tule kodih valmehekse.

Ijäkäs naine rakkahal hyvittelöy rahvastu Uvven Vuvvenke, kallistau Rastavua. Minä ozutan hänelleh Oma Mua -lehtie, häi buito tiedäy sen olemizes olendas, ga lugie ei nähtä.

– Anna Jumal mieroh kaikkie hyviä, ristittyzil tervehytty da ozua. Da piädielo on se, anna voinua ei rodei. Anna rauhuos eletäh vai ristittyöt. Minä kaksi voinua näin. Äldähes rahvasrukat nähtähes sidä, midä meil pidi nähtä da tirpua. Hyvin mustan, kui minä, kaksitostuvuodehine tyttöine, omienke peityimmö sarualoih da meččih, konzu suomelazet da ven’alazet Kirvesjärves poikki ammuttih da pommittih. Sit vai kuulin: “Urraa!” da vastah “Huomenta!” Kai järvi kiehui bul’kundua. Voi mitus sruasti oli. Anna mieroh kai rodieu hyvin, toivottau Marija Iljinična.

Hyvät Karjalan muan rahvas!

Karjalan Rahvahan Liiton puoles hyvittelemmö teidy Uvven Vuvven da Rastavan kel. Anna net tuvvah kaikile meile lykkyy da rauhua, tervehytty da iluo, uskuo parembah huomizeh. Voigua hyvin, pidäkkiä huoldu lähembäzis.

KRL:n piämies Aleksandr Jeremejev.

 

Oma Mua -lehen luatijat ta lukijat!

Onnittelemma kaikkie teitä Uuvvella Vuuvvella ta Roštuolla! Tahomma toivottua teilä käršivällisyttä, jotta keštyä tämän pandemijan vaikeukšie, ta jotta riittäis voimua jatkua meijän yhteistyötä karjalan kulttuurin hyväkši. Šamoin toivotamma lujua tervehyttä ta onnie uutena vuotena, uušie lukijie, kiinnoštavie kertomukšie, jotta meijän Oma Mua -lehti olis viela parempi. Anna eläy meijän kaunis karjalan kieli!

Vienan Virta -järještön johtaja Anni Vlasova.

Hyvät karjalaiset!

Armahalla Oma Mua -lehellä on nyt varma kielitiijollini kanta, huolelliset korkietašoset ruatajat, tai myö, lukijat, niise mielihyvin vuotamma omakielisie šanomie.

Himottais uškuo, jotta myö voimma hyövyttyä toini toisiena – kekšie uušie šanoja ta kertomukšie, muissella vanhoja aikoja ta uškuo lehen pitkäh elämäh.

Uuvven Vuuvven ta Roštuon kynnekšellä tahon onnitella lehen toimittajie, lukijie ta kaikkie karjalaisie tulijilla pruasniekoilla. Olkua tervehenä ta paiskua karjalakši! Kun Miikkula talvie näytteli, Kačo, Vasselei oveh jo koputtau, Roštuoki kättä antau ta Jäleššäh Vieristyä kulettau. Šiitä jo vuottakkua kevättä, Paremman toivošša eläkkyä!

Vienan Karjala -lehen entini piätoimittaja, kiäntäjä Raisa Remšujeva