Nykyaikaset folkryhmät keräyvyttih monikulttuuriseh VALGO-festivalih Petroskoissa.
Lauluja karjalan ta vepšän kielellä, perintehellisien šävelmien šovitukšie šai kuulla 21. oraškuuta Petroskoissa. Noin šeiččemen tuntie katkuamatointa muusiikkie eri tyylilöissä šoitettih Karjalan ta Piiterin joukot ta solistit: Andrei Dikojev ta Aleksandra Zabaikina, Jurii Žuk ta Alina Repetskaja, “ILMU”, “Hapanasasa”, “Si Ma” ta Nikita Anisimov io-ryhmän kera. Niise oli Anželika Božkon luvento.
– Monikulttuurini festivali onnistu ta myö ušomma, jotta šiitä tulou perinneh. Toivottavašti tämän tilaisuon vierahat niise tahotah šen jatkuo tulovaisuošša. Karjalašša on erittäin rikaš folk-musiikin perinneh, nyt še šuau vereštä henkityštä, še innoššuttau muusikkoja šepittämäh nykyaikaista musiikkie ta še miellyttäy kuuntelijie, šano festivalin järještäjä Anastasija Orlova.
Monet festivalih tullehet kuultih nykyaikaista musiikkie karjalan ta vepšän kielellä enšimmäistä kertua ta še šynnytti elävyä kiinnoššušta. Esimerkiksi, Si Ma -ryhmän ohjelmašša oli hieno Linnut-laulu vepšän kielellä. Šanakši, neiččyöt lauletah rauhallisie folk-lauluja, a Nikita Anisimov esittäy lauluja, kumpasien peruštehena ollah Vladimir Brendojevin karjalaiset runot. Karjalan kanšallisen teatterin näyttelijä ta io-ryhmän peruštaja antau uuvven näkökulman karjalankielisih runoih ta še šynnyttäy varmuutta, kuin taitava oli runoilija, vet tavallisissa elämän hetkilöissä hiän löysi kaunehutta ta näytti šitä ihanissa runoissa.
Joka esitykšen jälkeh šalissa kuulu lujie räpytykšie ta Bravo-karjahukšie. Joukkoja ta solistija pyytettih šoittua vaikkapa vielä yhtä kappalehta. Artistat šelitettih mistä hyö laulettih vepšäkši ta karjalakši. Toivottavašti enši kerralla šalissa tulou enemmän ihmisie, kellä enyä ei tarviče kiäntyä tekstijä.
Teksti ta foto: Uljana Tikkanen, Oma Mua 25.5.2022
