Ryhmä yhistäy perintehellisie karjalaisie runoja ta lauluja šekä šähköllistä musiikkie. Kuva: Veri-Ryhmän VK-Šivu
Veri-musiikkiryhmän enšimmäini äijiäl-al’pomi näki päivänvalon ta šitä voit kuunnella verkošša kaikissa musiikkišovellukšissa.
Veri-ryhmä esittäy etnošähkömusiikkie. Niin vanhoja lauluja šuau kuulla uuvvella tavalla.
‒ Myö tahomma yhistyä folk-musiikkie šähkömusiikkih, jotta enemmällä kuuntelijalla še olis mukava, šelittäy ryhmän šoittaja Vladislav D’omin.
Ryhmäššä on nellä henkie. Grigorii Arhipov ta Maksim Sel’ugin vaššatah šähkömusiikista ta nauhotukšešta studijošša, Vladislav D’omin šepittäy musiikkie šekä šoittau viululla ta jouhikolla, a Marija Timonen valiččou karjalankielisien laulujen tahi runojen tekstijä ta laulau niitä. Yksi kappaleh oli valmissettu muusikon Pekka Käpin kera.
‒ Vladislav antau miula kuunnella uutta musiikkie ta mie valičen tekstin. Mie käytin äijän tekstijä Kiestinkin karjalaisien runoušperinteheštä. Iče en kirjuta tekstijä, šanou laulaja Marija Timonen.
Laulut ollah karjalan kielellä. Kalevalašta šyntysin olija neičyt opaštu karjalua koulušša ta nämä tiijot autettih tekstien ymmärtämiseššä ta iäntämiseššä.
Veri-ryhmä ilmešty 2020 vuotena. Artistojen musiikkie šai kuulla konserttiloissa ta festivaliloissa Karjalašša, Piiterissä ta Leningradin alovehella.
‒ On mukava, jotta esitykših tulou uušie ihmisie ta hyö ei tiijetä toini toista, tutuššutah keškenäh konserttiloissa ta enemmän tiijuššetah folk-musiikista, lisyäy šähkömusiikin šoittaja Grigorii Arhipov.
Al’pomin esityš šuunnitellah viettyä Piiterissä ta Petroskoissa šulakuušša. Lisäkši ryhmällä on äijän materialie uušie musiikkikappalehie varoin.
Teksti: Uljana Tikkanen, Oma Mua 17.4.2024
